UCHAZE ABANINGI URAMAPHOSA ECAPHUNA INGOMA KA-BRA HUGH
UMENGAMELI omusha waseningizimu Afrika umnu Cyril Ramaphosa uchaze abaningi ngesikhathi ecaphuna amazwi asengomeni yenkakha yomculi we-jazz wakuleli esanda kushona uhugh Masekela.
Esephetha inkulumo ayethulele isizwe ngolwesihlanu ucaphune amazwi asengomeni kahugh esihloko sithi “Thuma Mina”, enamazwi ahumusheka ngesizulu athi: “ngifuna ukubakhona lapho abantu benqoba ubuphofu, ngifisa ukubakhona lapho abantu benqoba impi yengculaza; ngifuna ukufaka isandla; thuma mina.”
Ngesikhathi ecaphuna lawa mazwi kuchwaze iphalamende, washayelwa ihlombe, abantu bakhombisa ukukuthakasela abekusho.
Le nkulumo kamnu Ramaphosa ibonakala ilethe ithemba kubantu baseningizimu Afrika kanti namaqembu aphikisayo ayamukelile, ayichaza njengeletha ithemba kubantu bakuleli. Akuzange kusuke siphithiphithi ephalamende ngesikhathi kuqhubeka lo mcimbi, kodwa umnu Ramaphosa ukhulume waze waphothula inkulumo yakhe.
Phela bese kuyinsakavukela umchilo wesidwaba ukuthi kusuke isixokoxoko, kushube isimo njengoba amaqembu aphikisayo ephalamende, ikakhulukazi i-economic Freedom Fighters (EFF) ne-democratic Alliance (DA) abengayizwa nhlobo indaba kamnu Jacob Zuma obengumengameli ophume esikhundleni ngolwesithathu. Indlela obekushuba ngayo bekuze kuphoqeleke ukuba kungenelele onogada.
Umholi WE-EFF, umnu Julius Malema, uthe enkulumeni kamnu Ramaphosa uyakwamukela okokubuyiselwa komhlaba ngaphandle kwesinxephezelo.
“Siyakwamukela futhi nokokuncishiswa kwekhabhinethi njengoba besihlale sisho ukuthi baningi kakhulu abantu abangamalungu ekhabhinethi,” kuphawula umnu Malema.
Umnu Mmusi Maimane ongumholi we-da uthe uyavumelana nomengameli kwelokuthuthukiswa kwabesifazane abamnyama, oluthinta umhlaba kodwa wakubeka kwacaca ukuthi ngeke beyiqembu bakwazi ukweseka okokubuyiswa komhlaba ngaphandle kwesinxephezelo.
Ujenene Bantu Holomisa ongumholi we-united Democratic Movement (UDM) udalule ukuthi unethemba lokuthi kuzozonke izethembiso ezenziwe ngumengameli uzokwazi ukuthola ithimba elizomeseka.