LIBASHONELE ABABANDAKANYEKA ENKOHLAKALWENI: RAMAPHOSA
KUSAZOBASHUBELA ababandakanyeka kwinkohlakalo kuhulumeni njengoba umengameli wezwe umnu Cyril Ramaphosa ekubeke kwacaca ukuthi usazokhuculula kuzo zonke izinhlaka zikahulumeni ezithintekayo, okuhlanganisa kuzo namabhizinisi aphethwe nguhulumeni.
Umengameli Ramaphosa ngoLwesihlanu ebusuku, ephalamende ecape Town ubethula inkulumo yakhe yokuqala ebhekiswe esizweni njengoba engene kulesi sikhundla ngolwesine.
Le nkulumo yakhe ibibhekwe ngabomvu kwazise iqhamuka ngemuva kwezigigaba ezahlukene ezenzeke ngaphambi kokuba athathe izintambo zombuso.
Phakathi kwezinto ezihambe phambili enkulumeni yakhe wukulwa nenkohlakalo nokuyinto ebisidlangile ezinhlakeni ezahlukene zikahulumeni. Kule nkulumo yakhe eshayelwe ihlombe ngabaningi ukubeke kwacaca ukuthi ngeke bayibekezelele inkohlakalo.
“Amasela antshontsha imali kahulumeni mawabanjwe.
"Kumele silwe nenkohlakalo kuzo zonke izinhlaka ezithintekayo nasezinkampanini ezizimele.
"Kumele sikhumbule ukuthi uma kukhona ogwazayo ngaso sonke isikhathi kusuke kukhona ozimisele ukukhipha umgwazo, ngakho kumele silwe nazo zombili lezi zinto,” kusho umnu Ramaphosa.
Uthembise ukuthi kuzoba nezinguquko ezinqala ezinkampanini zikahulumeni ezithintekayo enkohlakalweni.
Unxuse izinhlaka zezomthetho ukuba zisebenze ngokuzikhandla ukuqinisekisa ukuthi abathintekayo bayabhekana nengalo yomthetho.
“Kumele ingalo yomthetho isebenze ngokuqina ukuze silwe nalesi sihlava esibhekene naso,” kusho umengameli omusha.
Uphinde wathembisa ukuthi uzoqinisekisa ukuthi izisebenzi zikahulumeni zihambisana nesisho se-batho Pele, okuwukubeka abantu phambili.
“Izwe lethu selingene esikhathini soshintsho. Nakuba ushintsho lwenza abantu babe nongabazane kodwa lunikeza amathuba okubhekana nezingqinamba ngendlela ehlukile,” kuqhuba yena.