Umdansi uphume ngesamagundane
Enkonzweni ka-angel
UDINWE wathelwa ngezibonkolo umphathi we-031 Movement ebiqashe umdansi waKwasanti ethekwini, oshone ngendlela engaqondakali ngemuva kokuxinwa wukugula.
Uwelly Gumede ( osesithombeni) uphume ngesamagundane enkonzweni yesikhumbuzo sika-angel Namhla Zulu, ebikwasanti ngolwesithathu ntambama, umphakathi usho ukumqeda, uthi makachaze ukuthi kwenzekeni ngo-angel njengoba kunezinsolo zokuthi ubulewe yisidakamizwa asithole esiphuzweni.
Uphoxekile ethi uyakhuluma esiteji kule nkonzo, amalungu omphakathi avele akhwela adilika, kwathi awamudle amqede. Amjijimezile efuna izimpendulo mayelana nokushona kuka-angel.
Uwelly uthi usindiswe ngonogada, abamphelezele baze bamshiya edolobheni ethekwini sebenesiqiniseko sokuthi uphephile.
“Ngithe ngisakhuluma kwasukuma oyedwa wathi angikhulu- me iqiniso. Ngithe ngisathi ngiyachaza kwavele kwavungama indlu yonke bethi mangichaze.
“Ngaleso sikhathi kuqhamuke unogada engingamazi wathi angiphume naye ngoba angisaphephile - yilapho-ke abangithathe khona bagada imoto ebengihamba ngayo saze safika ethekwini,” kuchaza uwelly.
Uthi okumcasula kakhulu wukuthi umphakathi ususola yena ekubeni naye ehlukumezekile ngokushona kuka-angel.
“Ngizame ngakho konke okusemandleni ukusindisa impilo ka-angel kodwa ngehluleka. Kuyimanje yimina engizamayo ukuba agcine efihleke ngendlela enesithunzi,” kuchaza uwelly.
Uwelly udalule ukuthi u-angel ubedle isidakamizwa esiyingozi ebesifakwe ngothile esiphuzweni, nokho akamusho ofake lesi sidakamizwa ngesikhathi besemcimbini obukwenye indawo yobumnandi ethekwini.
Kule nkonzo yesikhumbuzo umculo nomthandazo ubuyindlala, bekusho igqom nomdanso.
Iningi lezikhulumi belisukuma ngevosho. Bekugcwele abadansi abahlukene basethekwini okubalwa nalabo asebedumile, Amadada ase-afrotainment, aholwa ngusgaqa.
Ngendlela ebelisho ngayo igqom kubonakale namalungu omndeni nawo eseshaya ivosho kungasekho ukukhala.
Yize noma unina ubezilile kodwa ikhanda belinyakaza kutshengisa ukuthi ikhona into ayizwayo - uma isisho kakhulu ingoma ubevele aphakamise isandla.
Uwelly uthi ubezimisele ngokuphindela kwasanti ayoqhubeka nomsebenzi oqalwe ngu-angel wokusiza intsha kodwa uthi ngeke esalubhada ngoba usabela impilo yakhe.
makhoba@ilanganews.co.za