UBONGI DUBE NEZINSOLO ZOKULWELETA INKAMPANI YOMCULO
ISILOMO somculi, ubongi Dube ( osesithombeni), sesiyalelwe ukuba sikhokhe isikweletu okubikwa ukuthi sibhekene naso kuqala ngaphambi kokukhipha i-albhamu yaso esihlela ukuyidedela ngoNdasa (March) kulo nyaka.
Ubheki Loxion Dlamini ongumnikazi wenkampani iloxion Records obekuqopha kuyo ubongi ngaphambi kokunyamalala kulo mkhakha uthi lo mculi usakweleta ama-albhamu amabili ngaphansi kwenkampani yakhe.
Uloxion uthi ngokwenkontileka anayo ubongi kusamele aqophe ngaphansi kwenkampani yakhe, ngakho uyamangala uma esezwa ukuthi lo mculi usezinhlelweni zokukhipha i-albhamu.
“Akakangitsheli lutho nge-albhamu yakhe ngakho ngizolinda ngizwe ukuthi uzothini noma bazothini nethimba asebenza nalo. Okubalulekile wukuthi benze okufanele kwazise sagcina ukukhuluma eminyakeni engaphe- zulu kweyishumi eyedlule,” kuchaza uloxion. Uqhuba ngokuthi namanje akakazi ngezizathu zokushiya kukabongi enkampanini yakhe. “Ngisafisa angichazele izizathu zokushiya kwakhe ngoba wamane wavuka ekuseni wangitshela ukuthi useyashiya enkampanini. Makasho uma kukhona okumele kulungiswe ngoba kuhle kuhlonishwe izivumelwano nezinkontileka ezisayiniwe,” kuchaza uloxion engeza ngokuthi okwamanje ngeke asheshe achaze ngesinyathelo azosithatha uma ubongi egcina ngokuyikhipha i-albhamu.
Ethintwa ubongi utshele leli phephandaba ukuthi akukho lutho olumhlanganisa nale nkampani.
“Uma kuwukuthi ubona kanjalo naye kuzomele enze okufanele kodwa ngokwami akukho nokuncane okungihlanganisa naye noma nenkampani yakhe,” kusho ubongi othi uzoqhubeka nokukhipha i-albhamu yakhe njengokwezinhlelo zakhe.
“Uma efuna ukuthatha izinyathelo zomthetho kulungile sizohlangana khona. Ngaphambi kokuba ngibuye emculweni ngiqinisekisile ukuthi angikweleti muntu,” kusho lo mculi.
Ebuzwa ngembangela yokushiya kwakhe kule nkampani ucele ukubuye ahlale phansi nentatheli ayichazele ngoba wudaba olude.
Ubongi unengoma edlalwa kakhulu emsakazweni kulezi zinsuku esihloko sithi “Benginawe” ezotholakala kwi-albhamu yakhe ezophuma.