EZENKOLO:
KULEZI nsuku esiphila kuzo kuleli zwe lakithi, zonke izinkolo zivumelekile ukukhonza ngokukhululeka nokungesabi kodwa kusekhona abanye abangakakwemukeli lokho, obafica begxeka ezinye izinkolo esikhundleni sokushumayela ivangeli abalithunywe yinkolo yabo.
Yikho lokhu kugxekana okugcina sekuqhathe izwe, abantu baze babambane ngezihluthu.
Kuzo lezi nsuku, endaweni esingeke sayidalula ogwini oluseningizimu yetheku, kunabantu abebehambele umngcwabo wenye intokazi ebisindisiwe kepha abakubo bengasindisiwe.
Kubikwa ukuthi abazalwane bebandla likamufi abasindisiwe bafike kulo muzi babona kukhanyiswe amakhandlela, kushunqiswa nempepho maqede bazicisha lezi zinto, bathatha nehlahla lomlahlankosi balilahla laphaya, bephula imimoya yabomndeni kamufi.
Kuthiwa kuyo le nkonzo yomngcwabo, abebephethe inkonzo abebekhonza nomufi bakhwele badilika kwabebandla elikhonza ngokwesintu bashiya abangalazi.
Sithanda ukubexwayisa abanye abazalwane ngalezi zenzo ezinjengalesi ukuthi sekuyicala kuleli ukwenze njalo, bangathathelwa izinyathelo zomthetho libalahle icala.
Sithanda ukufunda encwadini yabasekorinte bokuqala, isahluko 9, siqale ukufunda evesini le-19 kuye kwelama-23 lapho kufundeka khona kanje:
“Ngokuba noma ngikhululekile kubo bonke, ngazenza isigqila sabo bonke ukuze ngizuze abaningi, kubajuda ngaba njengomjuda, ukuze ngizuze abajuda; Kwabaphansi komthetho ngaba njengophansi komthetho noma ngingephansi komthetho mina ukuze ngizuze abaphansi komthetho.
"Kwabangenamthetho ngaba njengongenamthetho, ngingesiye ongenamthetho kunkulunkulu kepha ngiphansi komthetho kakristu ukuze ngizuze abangenamthetho.
" Kwababuthakathaka ngaba buthakathaka ukuze ngizuze ababuthakathaka.
"Sengaba yikho konke kubo bonke ukuze ngakho konke ngisindise abanye.
"Ngikwenza konke ngenxa yevangeli ukuze nami ngibe umhlanganyeli kulona.”
Sizibuza imibuzo uma ngabe umphostoli Phawula ezisho yena ukuthi ubekwazi ukuzenza into angeyona ngoba enzela ukuzuza labo abangahambisani nevangeli likakrisu.
Pho laba abafika kwezinye izinkolo bazigxeke, baqalekise, kusuke sekutheni? Abalifundi yini ibhayibheli elingcwele elifundisa ukuzithoba nokungazikhukhumezi?
Abalifundi yini ivangeli likaKrestu elifundisa ukuthi thina singabadobi babantu? Bangayibamba kanjani inhlanzi bezoyixosha bona na?
Usemningi umsebenzi okusamele wenziwe ezinkolweni zonke ezikhona wokuqeda umoya wokubukelana phansi nokuzikhukhumeza.
Sesiphila ezikhathini lapho abantu bebeke eziphongweni amasonto abo hhayi imogomo yezinkolo zabo kumbe izimiso zamabandla abo. Ngalokho asisho ukuthi singashaywa isono - masibhaxabulwe yizwi hhayi imizwa yomuntu.
Uhulumeni waleli zwe useze wasungula ikhomishane ebizwa nge-the Commission for the Promotion and Protection of the Rights of Cultural, Religious and Linguistic Communities (CRL Rights Commission) ukunqanda zona izigameko ezifuze lezi.
Eminyakeni eyadlula, kusewumbuso wobandlululo, bezibukelwa phansi ezinye izinkolo kuqhakambiswe inkolo yobukrestu kuphela.
Sekumele abantu bakujwayele ukuthi sesinenkululeko, yingakho nje noma kuvulwa iphalamende kushiyelana inkundla izinkolo ezahlukene zethula imiyalezo yezenkolo. knowledge.simelane@ ilanganews.co.za