ABAFUNEKI ABASAKAZI ABANGAKELEMILE
UMSEBENZI womsakazo usekude ukuphela uma kuwukuthi kuyogcina kwenzekile nakuba kunengcindezi yobuchwepheshe banamuhla obumise kabi ezinye izinhlaka zokusabalalisa izindaba.
Ngomsombuluko esibuya kuwo womhla ziyi-13 kunhlolanja (February) bekugujwa usuku oluqanjwe ngeworld Radio Day, nalapho kuqhakanjiswa khona ukubaluleka komsakazo.
Lolu suku lumenyezelwe ngoLwezi (November) ngowezi-2011 KWI-UNESCO’S 36th General Conference.
Umsakazo unomthelela omkhulu kokwenzeka empilweni yethu nsuku zonke njengoba sithembela kuwo ukusinikeza ulwazi.
Okuhle ngawo wukuthi okuningi ukuthola bukhoma (live) kungaqoshiwe, yikho-ke okuwenza umsakazo ube mnandi noma ube yimbudane uma umsakazi engakelemile.
Okumnandi futhi ngomsakazo wukuthi nakuba yonke yakhelwe phezu kwezimiselo ezifanayo okuwukufundisa, ukwazisa nokuthokozisa kodwa ikhono lokukudlulisa lokhu liyenza yehlukane.
Ukudlulisa ulwazi kuphoqa ukuba umsakazi angabi ngumuntu ongazihluphi ngokulandela izinto ezenzekayo emhlabeni ngoba kungaba lula ukuba asifunze ushevu. Kufanele abasakazi bethu bazihluphe ngokulangazelela ulwazi ukuze bangahlazeki uma sebesemoyeni, kucaca ukuthi banengqondo encane ngokwedlulele.
Kumele umsakazi akwazi nje ukuhlaziya nokuxoxa ngokusuke kusematheni nakuba kungelula ukuba bukhali nxa zonke njengenkemba.
Kuyaye kudumaze ukuzwa umsakazi esebhudazela noma edlulisa into engelona iqiniso emoyeni ngoba kusuke kungeke kusaphindela emuva. Kasikho isikhathi sokwenza amaphutha noma sokuzwakala ungenaso isiqiniseko sokushoyo.
Okwenzeke ngesonto eledlule kukhombisile ukuthi umsakazo unamandla angakanani. Indaba yokubulawa kukasenzo Meyiwa esiyinzukazikeyi ngeke ingangeni emlandweni wezehlakalo ezishiye abantu bekhexile.
Indaba yokubulawa kwalo mdlali isiwumlando kodwa ukukhuluma bukhoma kukalongwe Twala noyise uchicco emsakazweni kuvuse okuningi kwabuyisa nethemba. Kuqale uyise kasenzo kwimetro FM nobalule amagama okuthiwa babekhona kubulawa indodana yakhe, waze wenza nezinsolo ezishaqisayo, kwathinteka namagama abantu.
Abanezinhliziyo nje ezisheshe zizwele nginesiqiniseko sokuthi bebechiphiza, bezwelana naye.
Ngemva kwalokho kuzwakale uchicco kuyo imetro FM ohlelweni olufanayo olushayelwa ngumo Flava nomasechaba Ndlovu, wabuye wezwakala nakwipower FM ohlelweni lukathabiso Thema.
Le misakazo ikucacise bha ukuthi umsakazo unamandla okulawula ingqondo nokwenza komuntu. Kangimangalanga-ke sekuvela ukuthi sekujutshwe kabusha uphenyo kulolu daba njengoba ingalo yomthetho iphinde yagxekwa kakhulu.
Laba basakazi bakwazile ukuphatha le ngxoxo ngendlela enelisayo. Lokhu kwenzeke kalula ngoba bebenolwazi ngokwenzekile ngalesi sigameko njengoba sidume izwe lonke.
Kubalulekile ukuhloma ngolwazi uma uzosisakazela, ungafiki nje umpumpununu.
zowakha@ilanganews.co.za Singayithokozela kakhulu neyakho imibono ngakho konke okuthinta ezemisakazo kule email engezansi nasezinkundleni zokuxhumana okutholakala kuzo umbhali.
Instagram: @zowakha Facebook: Zowakha Mbatha Twitter: @Zowakha zowakha@ilanganews.co.za