Ngeke akhohlwe unina engena enkundleni
UYAZIFELA ngenyama eyosiwe yakwamzoli, egugulethu, ecape Town, ujudas Moseamedi ongumdlali wecape Town City esembangweni wokudla isicoco se-absa Premiership.
Lo mdlali uthi uma engekho matasa nonobhutshuzwayo ujwayele ukuzitika ngenyama yakwamzoli okungenye yezindawo ezidumile ecape Town.
Lo mdlali uzalelwe emakhubidung Village, etzaneen, elimpopo. Ufunde esemana Primary School nasebokgaga High.
Ukudlondlobala kwakhe kunobhutshuzwayo kuholele ekutheni ufortune Mangena abedlala ekilabhini yakhe amfudukisele egauteng njengoba ugrade 12 ewuphothule e-east Bank High, e-alexandra, egoli. Udlalele imashakeni FC ne-17 Chocolates ngaphambi kokuyozama inhlanhla emakilabhini amaningi ehlukene.
Uzame inhlanhla kwibidvest Wits nakwihighlands Park kwangalunga.
Ube nenhlanhla yokujoyina izinhlaka ezincane zempumalanga Black Aces emnyusele esikimini esikhulu ngonyaka wezi-2015.
Ube esefudukela ecape Town ngemuva kokuba le kilabhu isithengwe ngujohn Comitis oyiqambe ngelecape Town City.
Ingxoxo YELANGA Langesonto nojudas ngempilo yakhe yangaphandle kwenkundla ihambe kanje:
ILANGA Langesonto: Ukhulele ekhaya elinjani?
Judas: Ngikhulele ekhaya elifudumele yize bekunzima ngoba sikhuliswe ngumama yedwa.
Igama lakhe nge-ellen. Ubaba udlule emhlabeni ngineminyaka eyisithupha ubudala. Lokhu kushiye umama nomthwalo wokusikhulisa eyedwa. Nokho-ke uzamile ukuvala isikhala sikababa.
Nguyena obesikhulisa nezingane zakwethu ukhutso neterrence.
ILANGA
Langesonto:
Usekhona nje umakoti?
Judas:
Okwamanje ngisaphila impilo yokuba yimpohlo.
Ngisagxile kakhulu kunobhutshuzwayo. Nokho-ke ngisalokhu ngibheka nje mhlawumbe uzoqhamuka engiyomenza umama wasekhaya.
ILANGA Langesonto: Yikuphi ukudla ozifela ngakho?
Judas: Ngithanda ipapa nenyama eyosiwe. Ngiyakuthanda nokuzikhipha ngiyokudla ecamps Bay, ecape Town, uma ngithola isikhathi.
ILANGA Langesonto: Yini ekuchaza ngecape Town?
Judas: Emadolobheni esengihlale kuwona icape Town ihamba phambili. Ngiyithanda ngoba iyindawo engaphithizeli futhi inezindawo eziningi zokuvakasha.
ILANGA Langesonto: Zikhona izimpahla ezikhethekile ozigqokayo?
Judas: Ngithanda ukugqoka noma yini engifanelayo. Nokho-ke okwamanje ngigqoka izimpahla zakwa-umbro ngoba ngixhaswe yile nkampani ngezimpahla zokugqoka.
ILANGA Langesonto: Yiluphi uhlobo lomculo olukushaya ngaphakathi?
Judas: Ngithanda umculo kaKing Monada wangasekhaya. Njalo uma ngivuka ekuseni ngidlala umculo wakhe bese ngilungiselela ukuya ejimini.
ILANGA Langesonto: Ukhona umdlalo owuchungechunge owukhonzile kumabonakude?
Judas: Mina kangiyena umuntu wezinhlelo zikamabonakude. Usibusiso Masina (odlala kwicape Town City) esihlala naye endlini ujwayele ukungibukisa Isibaya ngenkani.
Sengize ngamthanda ujudas Ngwenya (olingiswa nguMenzi Ngubane) ngoba sinamagama afanayo.
Mina
Nokho-ke akekho umdlali webucs obengichaza. Bengithanda uknowledge Musona obedlala kwikaizer Chiefs nosibusiso “Rhee” Zuma.
Urhee ngimhlonipha kakhulu ngoba uyisebenzele iningizimu Afrika okuholele ekutheni kufakwe umfuziselo wakhe ecopenhagen, edenmark.
ILANGA Langesonto: Uhlele ukwenzani ngemuva kokubeka amakhokho ethala?
Judas: Ngifuna ukuba nekilabhu yebhola ezodlala kwi-absa Premiership.
Kungichaze kakhulu okwenziwe ngukaizer Motaung ongumnikazi wechiefs nojomo Sono ophethe ijomo Cosmos.
Bonke abadlali bafuna ukuqeqesha nokuhlaziya ibhola kumabonakude ngemuva kokuyeka ibhola.
Mina-ke ngifuna okwehlukile ngoba ngifuna ukuba nekilabhu yami. Ikhona engizama ukuyisungula etzaneen njengoba ngihlela ukuthatha abadlali emqhudelwaneni wami obizwa ngejudas Moseamedi Festive Games.
Okungiphazamisayo nje wukuthi ubenni Mccarthy ongumqeqeshi wethu uhlale ethi angibalethe kwicity abadlali abenza kahle emidlalweni yami. Ngaphandle kokulobizela ukuba nekilabhu, ngifuna ukuthenga imizi ikakhulukazi lapha ecape Town.
ILANGA Langesonto: Uzifela ngombala onjani?
Judas: Ngithanda umbala ompunga, kodwa anginaso isizathu sokuthanda wona.
ILANGA Langesonto: Sikhona isiqholo esikhethekile osisebenzisayo?
Judas: Ngisebenzisa noma yisiphi engisizwe sinephunga elimnandi.
ILANGA Langesonto: Sikhona isilwane osithandayo nosesabayo?
Judas: Kangiyena nje umngani wezilwane. Ngiyadoja ngisho kuthiwa sizulela esiqiwini nekilabhu. Kangizikhonzile nje izilwane, ikakhulukazi lezi zasendle.
ILANGA Langesonto: Yimuphi umuzwa ongasoze wawukhohlwa empilweni yakho, okungaba womuhle noma omubi?
Judas: Kuhlale kungidla njalo ukukhula ngaphandle kukababa. Nokho-ke akukubi kakhulu ngoba vele udlule emhlabeni ngisemncane kakhulu.
Umuzwa omnandi engingasoze ngiwukhohlwe yingesikhathi umama wami engena enkundleni ezojabula nami sinqoba itelkom Knockout ngesizini edlule.
Ngishaye igoli esinqobe ngalo kulo mqhudelwano sihlula isuperSport United kowamanqamu ngasekhaya epolokwane. Umndeni wami ubukhona uzongeseka kulo mdlalo. Angisoze ngawukhohlwa lowa muzwa.