BAVIKE NGELANGA ELISHISAYO BESHIYWA KWI-DUSI CANOE MARATHON
UKUKHIPHA inhlanzi emanzini kwelanga kuphendulwe ihawu ngabagwedli abamnyama abebethembise ukuqopha umlando ngokuba ngabokuqala ukunqoba i-2018 FNB Dusi Canoe Marathon begwedla bodwa (bengabebala elimnyama).
Usbonelo Khwela nosiseko Ntondini bagcine bephume isithathu emjahweni wedusi oqale ngolwesine emgungundlovu wasongwa izolo ngomgqibelo emini eblue Lagoon, ethekwini. Lo mjaho ugcine unqotshwa nguhank Mcgregor no-andy Birkett kwathi isibili sathathwa nguCarl Folscher no-adrian Boros. Umjaho sewuwonke uhank no-andy bawenze ngesikhathi sika-8:12:22, kwathi ucarl no-adrian benza u-8:13:26 kanti usbonelo nosiseko benze u-8:13:29.
Indawo yesine ithathwe ngu-ant Stott nobanetse Nkhoesa ngesikhathi sika-8:13:40 kanti isihlanu kube nguJaques Theron nothulani Mbanjwa ngesika-8:35:56.
Ekhuluma naleli phephandaba emuva kwalo mjaho ukhwela, uthe: “Senze amaphutha amaningi aholele ekutheni sigcine sesihluleka ukunqoba. Lapho bekunamanzi amancane khona sithathe isikhathi eside (ukudlula) okusishayile. Kusibulele nokushisa kwelanga. Besizimisele kakhulu ngokunqoba umjaho wanonyaka.”
Uqhube ngokuthi bachithe amasonto amathathu bendawonye nontondini ukuzicijela lo mjaho eshongweni Dam. Uthi usebheke ukwenza kahle kwinon-stop Dusi Marathon ezokuba semasontweni amabili ezayo. Uphethe ngokuthi ufisa ukusibona sikhula isibalo sabamnyama ababamba iqhaza kulo mjaho.