Ngihlaba ukuziphatha kwabadlali bebhola bakuleli
ZIYAJABHISA izindaba ezilokhu ziqhamuka emithonjeni yezindaba ngokuhluleka ukuziphatha kwabadlali bakanobhutshuzwayo ezingeni elikhokhelayo.
Lezi zindaba zishiya inselelo enkulu esabhekene nezimenenja zabadlali bakuleli ukungagcini nje ngokutamuza imali yabo kodwa zibasize ukuqonda kahle ukuthi umdlali webhola elikhokhelayo uziphatha kanjani ngaphandle nangaphakathi kwenkundla.
Okubi nakakhulu wukuthi lesi sihlava sibhidlange kakhulu kunobhutshuzwayo kwazise kuyaqabukela nje kwabombhoxo nekhilikithi.
ILANGA muva nje libike kabanzi ngokuxoshwa kukasiphesihle “Arigogo” Nzimande okhonjwe indlela yireal Kings egijima kwinational First Division (NFD). Ulahlwe yicala lokweba iselula kasiphiwe “Magolide” Mbatha.
Ubesolwa nangokunyamalala kukamabonakude wale kilabhu obusetshenziswa ngabadlali e-clubhouse.
Unzimande usejoyine ijomo Cosmos eyibambe kusona lesi sigaba. Okujabhisayo nje ngalo mdlali wukuthi cishe ngabe uyabatshazwa kwi-absa Premiership ukuba uziphatha kahle njengoba efike ngeshodi kwilamontville Golden Arrows eminyakeni eminingi edlule nokho ahlukane nayo sekukubi.
Udaba lukanzimande lulanywe ngukumiswa kukakgoloko Thobejane ongumqeqeshi webaroka FC osolwa ngokugoxana notshwala ebhasini yekilabhu kubuywa emdlalweni nefree State Stars abehlulwa kuwona ngo-2-0.
Kuthiwa lo mkhuba uthobejane ubewugila nabadlali abamqoka kubalwa u-oscarine Masuluke ongunozinti no-olaleng Shaku ongukaputeni nabo abamisiwe njengoba bejima nesikimu esincane.
Bayaluphika lolu daba. Bazovela ekomidini lezigwegwe lale kilabhu ngelizayo.
Kusabatshazwa lokhu, sekuxoshwe u-erwin Isaacs obelihlikihla esiswini kwi-ajax Cape Town ngezinsolo zokweba amakhokho omqeqeshi wenkulisa ye-urban Warriors, ufoppe de Haan wasenetherlands.
U-isaacs uchithwe ngolwesine emuva kokulahlwa yicala ekomidini lezigwegwe le-ajax elwa nokuvika izembe.
Ikusasa likathandani “Bibo” Ntshumayelo liphahlazeke ematsheni kutholakala ukuthi usebenzisa i- cocaine.
Lo mdlali umisiwe kwi-orlando Pirates emuva kwalesi sigameko.
Nakuba zikhona futhi ziziningi ezinye izigameko ezinyathelwa ngamakilabhu ngabadlali bawo ukuzama ukuvikela ikusasa labo nesithunzi sekilabhu, kodwa ukuphumela obala kwalezi kukhomba inkinga ebhekene nonobhutshuzwayo wakuleli.
Abadlali abadumile futhi abacebile emhlabeni kakujwayelekile ukuthi baziphathe kabi ngalolu hlobo. Njengamanje ucristiano “CR7” Ronaldo ongumdlali ovelele emhlabeni, kubikwa ukuthi uba ngowokuqala ukufika ejimini yereal Madrid ayigijimela kwila Liga yasespain.
Abadlali bakuleli kumele bathathe isibonelo kusiyabonga “Bhele” Nomvethe wamazulu FC obalwa nabadlali abacebile kuleli kodwa ozibeke phansi futhi osagijima okwengane enkundleni yize eseyibambe kunobhutshuzwayo okhokhelayo iminyaka engaphezulu kwengama-20.