Indumalo kamccarthy nge-orlando Pirates
Sekuntwela ezansi ngekusasa likajele
UPHOXEKILE ubenni Mccarthy ongumqeqeshi wecape Town City kungahambi ngokwezifiso zakhe ngesikhathi kuqhathwa amakilabhu azogijima kwi-last 16 yenedbank Cup.
Ipremier Soccer League (PSL) iqhathe amakilabhu azogadulisana kwilast 16 yenedbank Cup ngolwesine kusihlwa egoli. Umdlalo obukeka uzokuba mnandi ngophakathi kwecape Town City ne-orlando Pirates.
Ngaphambi kokuba kuqhathwe la makilabhu, umccarthy uthe ufisa ukutonyulwa nekilabhu yama-amesha kulo mzuliswano.
Uthi isizathu salokho wukuthi ubefuna ukudlala engenayo ingcindezi enkulu obekuzokwenza ukuba aphumuze nabadlali bakhe abamqoka njengoba ezakhe zidlala iligi, yinedbank necaf Confederation Cup.
“Bengithanda ukubhekana nekilabhu yama-amesha ebingeke ingifakele ingcindezi kakhulu njengoba kuseza imidlalo eminingi enzima.
"Ngiphoxekile uma ngitonyulwa nepirates ngoba kuyacaca ukuthi kuzofanele ngiye kulo mdlalo nesikimu sami esiqinile.
“Nokho kayikho into esizoyenza sizokulwa ngoba siyayifuna nathi le nkomishi. Ngiyabona ukuthi indlela yethu inzima ngoba siqale satonyulwa newits kwi- last 32 njengoba manje sekuzokuba yipirates, kawusivumile neze lo mqhudelwano,” kuzikhalela umccarthy.
Kuzo ezithinta ibucs, kuvele imibiko engaqinisekisiwe yokuthi uhappy Jele uthenjiswe inkontileka entsha ngusihlalo wale kilabhu u-irvin Khoza.
Inkontileka kajele nebucs iyaphela uma kusongwa le sizini. Ngokomthetho lo mdlali usenalo ilungelo lokusayina eyesibambiso nanoma iyiphi ikilabhu emfunayo.
Kuthiwa akhona amfunayo kodwa asaba ukhoza yingakho engadlaleli kuyena.
Ujele uke wangadlala kanga- ngoba ukhoza kuthiwa ubesemanqika ukumnika inkontileka. Nokho kuthiwa njengoba esedlala nje, umshaye ikhanda ukhoza njengoba esemthembisile ukuthi uzomnika inkontileka.
Leli phephandaba lizamile ukushayela ukhoza ukuzwa ngekusasa likajele kodwa ucingo lwakhe belukhala kodwa engalubambi. Nokho umilutin “Micho” Sredojevic ocija ibucs, uthi usasidinga isipiliyoni salo mdlali.
Isiyonke imidlalo yenedbank Cup Last 16 iqhathwe kanje, ikilabhu esekuqaleni izodlalela ekhaya: Kaizer Chiefs vs Stellenbosch; Cape Town City vs Orlando Pirates; Royal Eagles vs Maritzburg United; Amazulu vs Ubuntu Cape Town; Free State Stars vs Chippa United; Mamelodi Sundowns vs EC Bees FC; Bloemfontein Celtic vs Richards Bay; Baroka vs Steenberg United.
Bengithanda ukubhekana nekilabhu yama-amesha....