U-DJ Muntu utholane nendodana kufacebook
WESULEKE izinyembezi zeminyaka ehlangana noyise enkundleni yokuxhumana, umdlali wekaizer Chiefs (under- 19), uletha Dukashe (18).
Uletha washiywa nguyise ecape Town, eseneminyaka emibili ezelwe njengoba eze wathola manje kufacebook ukuthi UDJ Muntu odume ngelikamaster Blaster, osemnkantshubomvu endimeni yokuklwebha amapuleti, nguyena uyise.
Elandisa ILANGA Langesonto uletha, uthi kufike obaba bangakubo Kwalanga, ecape Town, bamtshengisa isithombe ebesisekhasini laseyadini (Facebook), babuza ukuthi uyamazi yini lo muntu (osesithombeni).
Uthi uvele waxakeka, base bemtshela ukuba ayosikhombisa unina, nguyena ozomtshela ukuthi ungubani lo muntu. Unina uthe ebona lesi sithombe, wamtshela ukuthi nguyise owamshiya eneminyaka emibili.
Ngaleso sikhathi uletha uthi ube nokucasuka ngenxa yokuthi usephile iminyaka eminingi engamazi uyise.
“Yize umama ubekhona benogogo kodwa besikhona isikhala sikababa ngoba ngingumfana, kukhona izinto okumele ngizibuze kuyena njengendoda,” kulanda uletha.
Uthi kodwa wesulekile izinyembezi ngesikhathi esexhumana noyise, futhi emamukela ngentokozo.
“Engikujabulelayo wukuthi naye ukujabulelile ukutholana nami, waphinde wakusukumela phezulu ukuxhumana nami nomndeni wami,” kusho uletha.
Unina noninakhulu wakhe nabo kubikwa ukuthi bajabule ngokuvela kukayise kaletha.
Ethintwa UDJ Muntu ngalolu daba wehluleke nawukuzibamba yinjabulo. “Bengingazi nokuthi ngizomfuna ngimthole kuphi umfana wami kodwa bengazi ukuthi ukhona,” kuchaza umuntu.
Uthi ethola ngodaba lwendodana yakhe, ushiye konke abekwenza wanikela enaturena, egoli, ekhaya lekaizer Chiefs lapho indodana yakhe ihlala khona.
Ucele ukuba imxhumanise nonina naye okujabulele ukuphinde axhumane noyise wendodana yekhe.
Kuyimanje UDJ Muntu uthi usemalungiselelweni okuyolungisa akhokhe lokho abazomfuna khona.
“Ngamaholide ephasika ngizomletha ekhaya emlazi, ngimazise emndenini bese ngihlela nomndeni kanina ukuba ngikhokhe inhlawulo nokunye abazokudinga ukuze abe ngowami ngokuphelele, abize isibongo sakwakhoza,” kusho UDJ Muntu.
Uphinde waveza ukuthi ikhona futhi enye ingane yakhe eyamdukela nayo isencane.
“Sekushoda umntwana wami ongowentombazane-ke manje naye lapho ekhona ngicela aziveze,” kusho UDJ Muntu.
Uletha njengamanje umatasa nezifundo zikamatikuletsheni. Uthi ubona ikusasa lakhe liqhakaze kakhulu ebholeni. Izindleko zokufunda uthi uzikhokhelwa yikaizer Chiefs.