INHLANZI ISHELWA NGAMANZI KU-AJAY GUPTA
Kukhona asebekhiphe umehlokaboni ngokubanjwa kwakhe
KUZOFEZEKA isisho sesiZulu esithi”ayikho impunga yehlathi”uma oklebe bephumelele ukubopha umnu Ajay Gupta osekuphela isonto ezulelwa ngamanqe ngenxa yokuthinteka kwakhe ezenzweni zenkohlakalo. Inhlangano engenzi nzuzo kuleli iforensics For Justice (FFJ) imemezele ukuthi ibeke phansi isizumbulu semali engama-r100 000 ezonikezwa lowo ozokwazi ukuthola umkhondo wokuthi ubhacephi.
Ngomgqibelo I-FFJ imemezele futhi ukuthi izophinde yengeze esinye isixhamali esingama-r100 000 ukuze kuboshwe ezinye izelamani zakwagupta okunguMnu Atul nomnu Rajesh (Tony) kanti imibiko engaqinisekiswanga ngeyokuthi nendodana kamengameli Jacob Zuma ebisebenzisana nabo, umnu Duduzane Zuma, ingahle iphenywe.
Okhulumela uphiko loklebe, ubrigadier Hanguan Mulaudzi, ucashunwe ngabezindaba eqinisekisa ukuthi abamlandela ezithendeni ngumnu Ajay.
Kubikwa ukuthi ukuthungathwa kwalempunyela yakwagupta kulandela ukuboshwa kwabathile abathinteka odabeni lomkhonyovu wepulazi elalimiselwe ukusiza umphakathi esifundazweni saseFree State kepha kwagcina kuhlomule abambalwa.
Ngolwesithathu oklebe bayabule babopha abayisi-8 kubalwa zikhulu zenkampani i-oakbay, umnu Varun Gupta, umnu Nazeem Howa nonkz Ronica Ragavan.
Bavele enkantolo yemantshi yasebloemfontein ngolwesine banikezwa amabheyili ehlukene asukela ku-r10 00 kuya ku-r20 000.
Imizamo yokuthola ubrigadier Mulaudzi iphunzile kwaze kwafika isikhathi sokushicilela ucingo lwakhe lukamakhalekhukhwini belungayithathi ngisho nemiyalezo.