Uleko ushelwa yivuma FM
Uthi uzosebenza nanoma yisiphi isiteshi esimfunayo
LINGASE lilahlekelwe yinkakha kwezomsakazo igagasi FM njengoba kuseyisikhathi sezinguquko eziteshini zemisakazo eminingi.
Uleko “Lekomotion” Ngcobo yisilomo somsakazi esibeke phansi umbobho wokusakaza emuva kweminyaka eyevile kwengu-20, sagxila ekuhlonzeni nasekuthuthukiseni ithalente ngaphakathi esiteshini somsakazo igagasi.
Imithombo YELANGA LangeSonto engashayi eceleni ithi uleko ukhonjwa esiteshini esingumakhelwane, ivuma FM, lapho angase angene ezicathulweni zikatrevor “TP” Philips owethula inameless Drive noNomfundo M, ngehora lesithathu kuya kwelesithupha ntambama.
U-TP kuzokhumbuleka ukuthi ushiye igagasi ngonyaka odlule nozakwabo abesakaza naye, uthandolwethu, osekwi-east Coast FM.
Kubikwa ukuthi UTP useyozinza phesheya kwezilwandle nokuyilapho umndeni wakhe usuzinze khona.
Ethintwa uleko uvumile ukuthi ivuma ngesinye seziteshi ezimeshelayo njengoba kwaziwa ukuthi yisikhathi sezinguquko.
“Kunezinkampani eziwuthandayo umsebenzi wami njengoba wazi ukuthi sengiqede iminyaka engama-20 ngikulo mkhakha, okusho ukuthi ulwazi enginalo lusezingeni eliphezulu.
“Uma ngithola izincomo futhi ngishelwa yizinkampani ngike ngizizwe ngithobekile ngoba kusho ukuthi bayalithanda igalelo lami. Okwamanje kakukabi nalutho olubambekayo,” kusho yena.
Ebuzwa ukuthi angakuthakasela yini ukuyojoyina ivuma FM uthe: “Noma iyiphi inkampani efisa ukusebenza nami anginankinga ngoba le nto yomsakazo iwubizo kimina,” kuphetha uleko.
U-TP efonelwa ukhale ngomsindo wendawo abekuyo, wathi uyashayela. Ebuzwa ukuthi ngabe uyashiya yini kwivuma FM, uthe cha kakunjalo kodwa wavuma ukuthi uya phesheya kwezilwandle. Akathandanga ukuphumela obala ukuthi uhamba isikhathi esingakanani.
Utee van Heerden, oyimarketing Manager kwivuma FM, uthe: “Ngingakuqinisekisa ukuthi kunabantu esikhuluma nabo kodwa kakukabi khona lutho olubambekayo okwamanje.”