Umculo ka-obrey M uthinta izinhliziyo
Uyazigqaja ngokuba ngumntwana kankulunkulu
UMCULI wokholo, u-obrey M, ukholwa wukuthi izimo ezinzima adlule kuzo yizo ezimshintshe waba ngumuntu ogxilile ekukhonzeni ujehova futhi zamenza wakwazi nokubhala umculo othinta izihliziyo zabantu.
Lo mculi wasedaveyton, egoli, ogama lakhe langempela nguObrey Mashigo, uthi kuningi ubunzima adlule.
Uthi uke waginqika nemoto walimala, wagula wabangwa nezibi; uphinde wathunjwa; wabhekana nesimo esishubile sokuphelelwa yizimali.
“Ngikholwa wukuthi unkulunkulu ubengiqinisa ukuze ngiphume ngishumayele izwi lakhe,” kuchaza yena.
U-obrey uyazigqaja ngokuba ngumntwana kankulunkulu osindisiwe. Uthi ukuhamba ngendlela enokukholwa phakathi kwenze impilo yakhe yahleleka. Uthi use qede iminyaka eminingi esemculweni. Useke wasebenza nezinkakha okubalwa kuzo usolly Mahlangu, Benjamin Dube, Donnie Mcclurkin, nomarvin Wayans kodwa elakhe ithuba lokukhipha i-album belingakafiki.
“Ngike ngazama ukukhipha i- album phambilini kodwa ngahluleka. Ngikholwa wukuthi bekungakabi yisikhathi sami. Unkulunkulu ubengakholwa wukuthi sengikulungele ukukhipha i- album,” kuqhuba yena.
Lo mculi kumanje usekhiphe i- album esihloko sithi, “Isimemezelo” eke yaqokwa kumaCrown Gospel Awards ngonyaka owedlule nakwingoma Awards wahlomula.
“Inhloso enkulu ngale album wukuletha ithemba kubantu, ngibatshele ukuthi likhona ithemba elingujesu. Noma ngubani oyilalele ngiyazi uzokwelapheka,” kuqhuba yena.
Ephawula ngezimo ezenzeka manje ezinkonzweni nezibukeka zihlehlisa abazalwane enkosini uthi: “Izinto ezenzekayo kazingethusi. Ujehova waphrofetha ngazo, kuwukugcwaliseka kwesiphrofetho nje kodwa kumuntu nomuntu zithi lungisa indlela yakho isikhathi sisekhona,” kuphetha yena.
Noma ngubani oyilalele ngiyazi ukuthi uzokwelapheka.