Bekushukuma ecovenant Fellowship
“ELOYI! Eloyi! Lamasabathana! Nkulunkulu wami, Nkulunkulu wami ungishiyelani!”
Lawa ngamazwi atholakala encwadini kamathewu 27, okungamazwi esine ashiwo yinkosi ujesu ilenga esiphambanweni. Emazwini ayisikhombisa lawa ngawesine afundwe ngumfundisi Ndumiso Ngema webandla icovenant Fellowship International Church CFCI ophongolo, enyakatho yekwazulu Natal.
Kubefundisi baleli bandla abayisikhombisa, umfu Ngema ube ngomunye wabashumayele baqeqebula egxile kulawa mazwi enkosi ujesu enkonzweni yephasika ebisezinkundleni zemidlalo zekolishi Umfolozi FET College esikhaleni, empangeni.
Umholi wabo, umphostoli Collins Dhlomo, ubanikeze imizuzu eyisihlanu nje kuphela ukuba bafeze izintshumayelo zabo. Nebala abaphoxanga ngale mizuzwana nje bebedubula ngombayimbayi oyizwi kunyakaze itende elikhulukazi .
“Ujesu washo lawa mazwi ekhala. Wayengakhali ngoba ezwa ubuhlungu kepha okwakumkhalisa kakhulu wukushiywa nguyise owayengakaze amshiye ngaphambilini.
“Babekade bemshiya abantu ezikhathini eziningi kepha wayengakaze akhale, wayengakugqiziqakala ukushiywa ngabantu kepha ukushiywa nguyise kwamenza wezwa iminjunju engachazeki,” kubeka umfu Ngema.
Umfu Ngema uqhubeke wathi: “Bekungokokuqala ukuba ujesu abize uyise ngonkulunkulu, angasho kuthi Baba. Wabona ukuthi uyise umshiya ngoba emadixadixa yizono zethu, naye wazibona ukuthi akasafanele ukubizwa ngendodana, yingakho wathi ‘Nkulunkulu wami, ungishiyelani na’. Kanjalo kumele sikuqaphele ukukhaliswa ukulahlwa ngabantu. Abantu bangakulahla kepha uma unkulunkulu engakuwe ukhalelani ngoba okwakho wukuba uthi kuye Nkulunkulu wami ungishi- yelani na. Uzokuzwa, akuxazululele zonke izinkinga ezikuhaqile.”
Umfu Ngema wenabe wathi: “Ngesikhathi bekulahlile abantu wena bese umemeza unkulunkulu ubabuyisa babe yizinkumbi ungakholwa. Unjalo unkulunkulu wethu esimkhonzayo - uyalalela, uyasithanda ngothando olungena- mibandela. Mbize njalo nasenhluphekweni.”
Kule nkonzo abanye abethule amazwi ayisikhombisa kube ngumfu Phumlani Njilo wasethekwini, Mfu Nhlanhla Soji wasethekwini, Mfu Bheki Mpungose wakwanongoma, Mfu Khulekani Jele wasebiva, Mfu Themba Mkhwanazi wasejozini nomfu Bheki Gazu wasolundi.
Umengameli wezwe, umnu Cyril Ramaphosa, obekhona kule nkonzo ngaphambi kokwethula inkulumo yakhe, ulincomile ikhono lalaba befundisi wathi bashaya emhlolweni, baliphaka ngendlela izwi lenkosi.