ICHIEFS ISHELA OXAKWE YI-EUROPE
IKAIZER Chiefs ebhinjelwa yizinto kulezi zinsuku ishela ulebogang Manyama ( osesithombeni) okuvela ukuthi usefuna ukubuya njengoba edonsa kanzima e-europe.
Ichiefs isiphenduke ihlaya kubathandi bebhola njengoba sekudlule amasizini amabili nesigamu ingakaze inqobe inkomishi enesithunzi. Lokhu sekuholele ekutheni abanye abalandeli bayo bayidube njengoba sekuba nengcosana emidlalweni yayo yasekhaya.
Leli phephandaba lihoshe ngemithombo yalo ukuthi ukaizer Motaung ongusihlalo wale kilabhu, usekhiphe umyalelo wokuba kukhucululwe lonke uvucu lwabadlali, kusayiniswe abazobuyisa isithunzi sale kilabhu. Kuthiwa ichiefs imatasa icubungula izicelo zomsebenzi esezifakwe ngabaqeqeshi njengoba kubikwa ukuthi usteve “Mphathi” Komphela useqedela le sizini, vele usenikiwe incwadi emkhululayo.
Kuthiwa le kilabhu ishela umanyama odonsa kanzima kwikonyaspor yaseturkey njengoba isikimu esizwa ngendaba.
“Emuva komdlalo wechippa umotaung ubone kungcono azibambele mathupha ngoba uyabona ukuthi umkhumbi uzika ebhekile.
"Ngesizini ezayo kuzobonakala ubuso obuningi obusha nobudala osebuke basebenza kule kilabhu. Kungase kubuye nethimba elisebenze nostuart Baxter eligudluzwe ngukomphela.
“Umanyama useqhulwini kubadlali abagaqelwe yichiefs, vele kudala yamfuna kodwa igodola nemali. "Namanje usakhala umotaung ngesinqumo sikakomphela sokuhambisa ureneilwe Letsholonyane.
"Neyokuhanjiswa kukalorenzo Gordinho ubengayizwisisi kodwa ngenxa yokuthi akafuni kuthiwe ugxambukela emsebenzini womqeqeshi wagwinya itshe. Usethule kwanele manje, usezibambele mathupha.
"Useyathumela kulokho afuna ukuba kwenzeke akasakholelwa ekutholeni umbiko ezinye izinto sezenzekile,” kusho lo mthombo.
Ubobby Motaung oyimenenja-jikelele yechiefs, ushaye ngamafuphi wathi abalandeli babo mababekezele nje, balinde isizini isiyaphela. Uthi kuningi abazokubona okungase kubajabulise.
Isiyonke imiphumela yemidlalo yayizolo YENFD imi kanje: Uthongathi FC 1, Ubuntu 1; Mbombela 0, Stellenbosch FC 2; Tshakhuma 1, Real Kings 1; Pretoria University 4, Cape Town All Stars 3; Richards Bay 1, Super Eagles 2; Highlands Park 3, Mthatha Bucks 0.