Kwembulwa kwembeswa kowe-avante
Ulinda uxinwe wukugula, kwaphazamiseka izinhlelo zeqembu
KUBAMBEKE insika yeqembu elidumile lomculo wokholo, i-avante.
ILANGA Langesonto lithole ukuthi isimo asisihle neze kulinda Gcwensa oyilungu eliqavile le-avante. Ukuxineka kwakhe, sekunesikhashana, kubikwa ukuthi sekuze kwaphazamisa nezinhlelo zaleli qembu njengoba kwaziwa ukuthi uhamba phambili ngisho nasezingomeni eziningi zalo. Ukubambeka kukalinda kuqinisekiswe ngelinye ilungu laleli qembu, ulucky Cele, washo nokuthi impela baphazamisekile ngalesi simo. Nakuba isimo kuthiwa asisihle kodwa ulucky uthe uzakwabo uyelulama, uphumile esibhedlela ngomgqibelo wesonto eledlule. Uphinde wakuqinisekisa ukuthi ulinda uxinwe yisifo sezinso, usanda kuhlinzwa esibhedlela. “Ukuhlinzwa kwakhe kube yimpumelelo. "Okwamanje sizomnika isikhathi alulame ngokugcwele ngaphambi kokuba abuyele emsebenzini weqembu,” kusho ulucky. Uvumile ukuthi impela ulinda uyinsika yeqembu njengoba edlala indima enkulu eqenjini futhi kunguye ohamba phambili ezingomeni eziningi ze-avante. Ulucky uphinde wagcizelela ukuthi ukugula kukalinda kubaphazimise kakhulu njengoba bekukuningi abebekuhlelile kulo nyaka okubalwa nokukhipha i-albhamu nokuhambela izindawo ezahlukene. “Siphazamisekile kakhulu kodwa akukho esingakwenza ngaphandle kokwamukela, simbeke emthandazweni alulame ngokugcwele ngoba siyamdinga kakhulu,” esho.
I-avante inamalungu amahlanu okubalwa kuwo yena ulinda, ulucky, ujames Langa, usibonelo Dlamini nosizwe Mtambo.
Kuzokhumbuleka ukuthi usibonelo nosizwe basanda kulijoyina leli qembu njengoba bese kusele abathathu (Linda, Lucky nojames) ngemuva kokudlula emhlabeni kukabongani Ngcobo ngowezi-2004 nosiphiwe Khanyile odlule ngowezi-2011.
Ingelinye lamaqembu omculo wok- holo asezakhele udumo kulo mkhakha njengoba ike yahlabana ngezindondo ezahlukene yaphinde yasebenza nenqwaba yabaculi okubalwa kubo udonell Jones, Ringo Madlingozi, Rebecca Malope, Professor nabanye abaningi. Ngonyaka owedlule leli qembu lihlonishwe emcimbini Uvukile Gospel Festival.
Imizamo yokuthola iwele likalinda, ulindani Gcwensa iphunzile njengoba ucingo lwakhe lukhale lwangabanjwa.