UMBONO:
IMITHOMBO eyehlukene yezindaba ilokhu inkenteze njalo ngokubo-nakala komthakathi (ICASA) ecanasa enqunu emagcekeni EPSL.
Siyafisa ukwazi ukuthi le-icasa inolwazi olungakanani ngokuphathwa kwezemidlalo namabhizinisi athinta lo mkhakha.
Le ntimbothi ehlongozwa yi-icasa yokufuna ukuzibambela ezinhlelweni zokusakazwa kwemidlalo kumabonakude, idinga ukukhahlelwa ngazo zombili izinyawo.
Ibhola ilona elizolimala kakhulu, okusho ukulimala kwendlu emnyama.
Phela ngaphandle kwamatekisi, ibhola yilona bhizinisi esiziqhenyayo ngalo njengendlu emnyama. Kwesinye isikhathi akusizi ukulwa nenkabi ube ungayazi ukuthi ithunywe ngubani.
Uma kukhona abantu abalwa nodkt Irvin Khoza abaphumele obala, ibhola alingathelwa ngamachaphazelo. Ngenhlanhla ukhoza uyindoda ekwaziyo ukuzilwela akalona igwala. Usekukhombise kaningi ukuthi uyindoda engakwamukeli ukuchukuluzwa.
Kusemqoka ukuthi umnyango Wezokuxhumana okuyiwona osebenzisana ngqo ne-icasa kanye nomnyango Wezemidlalo, iphumele obala ngokuthi imi kuphi kulolu daba. Isimo sepolitiki sezwe lakithi asikakabi bikho ezingeni lamazwe athuthukile (First World Countries).
Kuleli lakithi abanye bafakwa ezikhundleni ngoba bekhulumela futhi ikakhulukazi uma kunemihlangano emagatsheni, ezifundeni nasezifundazweni. Kunamachilo abantu ovele udideke ukuthi bangene kanjani ephalamende nakwizishayamthetho zezifundazwe ngendlela ababuye banhlanhlathe ngakhona.
Kuyoba yishwa ke uma becentela ISABC ngoba zolo lokhu ibisimemezele ukuthi izodiliza izisebenzi. Lokho kukodwa kusho ukuthi imali ayikho.
Pho ihhashi (IPSL) liphoqelwani ukuphuza lapho lingathandi khona?
Emgwaqeni kuzomele indlu emnyama ingene ngoba engathi iziphathimandla yilona limi eziluqonda kahle. Ngeke kulimale amakilabhu ebhola kuphela, kunabantu abadayisayo ezinkundleni uma kunemidlalo.
Ezokuthutha ikakhulukazi amatekisi, ziyahlomula nxa kunemidlalo. Izindawo zokulala ziyaye zigcwale phama uma kunemidlalo. Kunamatoho ayaye avele ngaphandle nangaphakathi enkundleni uma kunemidlalo.
Nomasipala inkongozelo bayayithola ngoba nalezi zinkundla ziyakhokhelwa, akudlalwa bhuse- nde. Izintatheli imbala zingachaphazeleka uma kungukuthi kuyaphela ngepsl. Ngeke-ke sivume ukuzoqinelwa ngabantu mhlawumbe abangakaze badlale ngisho ingqathu namagende lawa.
Nabadlali basemazweni aseAfrika bangafa olwembiza ngoba uma befuna ukuyodlala phesheya iningi seliqala kwipsl. ICASA ngathi ayikuqondi ukuthi ezwenikazi lase-afrika le ligi ihamba phambili, emhlabeni ibalwa namaligi ayishumi aphambili. IPSL iyibhizinisi ngakho-ke kumele yenze inzuzo.
Angikaze ngizwe ibhizinisi liphoqwa ukuthi alilahlekelwe yimali.uma ngabe labo sopolitiki bejatshuliswa ukhetho oselusemome, kumele bagawule babheke. Phela le icasa ingaphansi kwalo hulumeni ovotelwa yithina. Mhlawumbe abaqondi ukuthi singakwazi ukugodla amavoti ethu, ngoba abanye banamalunda ngenxa yevoti lethu.
Uma bengezukulalela imibono yethu komele sibaphoqe baphume baphele kwasephalamende,okanye basho ukuthi ubani lona obaphehla ngemuva. Asidingi size sibize u-angelo Agrizzi ukuthi azobafundisa ukuthi iqiniso libekwa kanjani obala.
Namaqembu esizwe angagcina esedlalelwa abapheki, oweta, abacwaningi bamabhuku, odokote- la nothisha njengoba kwenzeka komauritius naseseychelles. Izwe lakithi selifuna ukuba izwe lezinqibi, yonke into umahhala. Ibhola lisuka kude lapho abadlali babesebenza emini kuthi ntambama bese beya ejimini.
Ngokungena kwabaxhasi ikakhulukazi isupersport nabadlali abaneziqu bagcine beziphanyeka, badlala ibhola ngokugcwele futhi bayikha ngamafosholo imali.
Asibadingi abantu abazokuba nomona ngokwenza imali kwebhola.
Abantu abangezwani nokhoza abalwe naye siqu, ukuze naye abhekane ngqo nabo. Abangalwi NEPSL ngoba akuyona eyakwakhoza kodwa ngeyabanikazi bamakilabhu abafake imali eshisiwe ebholeni.
Ngeke ngithule ngoba ngingomunye wabantu ababe nesandla ekuthuthukiseni ibhola. Iminyaka engaphezu kwamashumi amathathu akuyona into yokudlala.
Angizishayeli ugubhu nempalampala, kodwa ngidlalise imidlalo YE-ABI iminyaka eyishumi nesishiyagalolunye.
Inhloso yethu bekuwukugxilsa ibhola ezikoleni. Imidlalo okubalwa kuyona EYEDTMB,EYE-ADIDAS, EYAMABELE BEVERAGES, EYEKENTUCKY EYEMONEYMINE neminye imiqhudelwano, ibambe elikhulu iqhaza ekuthuthukisweni kwebhola.
Asikwazi ukusebenza iminyaka emingaka bese sizobanjwa yi-icasa ngobhongwane.
Baningi abadlali abaphuma kuleyo miqhudelwano okubalwa kubona usiyabonga Nomvethe, utsepo Ntsoane, umalombo Sibiya, uvela Ngubane, uvusi Mncwango, umenzi Xulu, udelani Madonsela, ugeorge Khanyile, uricky Mthethwa, ujulius Chirwa nabanye abaningi. Kayehli kahle kithina esesihlale iminyaka ebholeni le nto ehlongozwa yi-icasa, futhi ngiphawula ngoba ngibe nesandla ekukhiqizeni abadlali abagcine sebebonakala komabonakude.
Ngeke ngivume imisebenzi yeminyaka izofakwa unyawo lwedada ngoba abantu benamandla epolitiki. I-icasa le isungulwe ngonyaka ka-2000.
Ngaleso sikhathi bekukade lisetshenzwa ibhola lethu. Asikwazike ukuzotshelwa ngabantu abangazi lutho ngezemidlalo ukuthi kumele liqhutshwe kanjani leli bhizinisi. Uhulumeni awukhuze le ngane yawo eyi-icasa ngoba kungenjalo uyolizwa ngendaba ivoti lethu.
Qaphela!!!! Le Ngosi umkhize uyibhala namuhla kuphela.