Umantashe uphika ukuhlomula kwibosasa
Izintatheli zigcine ziyile ukuyobheka ukulungiswa kwemizi yakhe
NJENGOBA umnu Gwede Mantashe ongungqongqoshe wezokumbiwa Phansi wayememe izintatheli ukuba ziyohlola emizini yakhe zibone ukuthi ngabe kuyiqiniso yini okuvele ngaye ukuthi wahlomula enkampaneni ibosasa, okuthiwa yamenzela umsebenzi wokuqiniswa kwezokuphepha, zigcine ziyile (izintatheli) emzini wakhe oseboksburg egoli izolo.
Umnu Richard Le Roux watshela ikhomishini kazondo ephenya ngezinsolo zokubhozonyelwa kombuso ukuthi wayesethimbeni lochwepheshe ababejutshwe ukuyokwenza umsebenzi olinganiselwa ku-r300 000 emizini emithathu kamnu Mantashe.
Umnu Mantashe wakuchitha lokho, wathi umsebenzi wokuqiniswa kwezokuphepha emizini yakhe wawuhlelwe yithimba lezokuphepha LE-ANC ngemuva kwezigameko ezahlukene zokugqekezwa.
Uthi into eyenza ukuba umnu Angelo Agrizzi owayeyi-coo yebosasa eze waqeda ukwethula ubufazaki bakhe obudonse izinsuku eziwu-9 kwikhomishini engazange aliphathe igama lakhe (umnu Mantashe) yingoba akazange nhlobo ahlomule kwibosasa.
Ugcizelele ukuthi akazange ngisho nangesikhathi esengunobhala-jikelele WE-ANC abe negunya lokusayina ukukhishwa kwamathenda kahulumeni noma ahlomulise ibosasa ngokwezimali nganoma ngayiphi indlela.
Uphinde wagcizelela ukuthi umsebenzi wokuqiniswa kwezokuphepha emizini yakhe yenziwa ngaphambi kokuba athathe isikhundla sokuba ngungqongqoshe ngonyaka odlule.