UYANGCWATSHWA NAMUHLA OWE- ANC
LIYANGCWATSHWA namuhla iphini likanobhala we-african National Congress (ANC), esifundeni iharry Gwala, eningizimu yekwazulu-natal, elilalelwe unyendle, ladutshulwa.
Ngemuva kokushona kukamnu Khayalethu Thobela, amalungu kakhongolose anxuswe ukuba angaziphatheli umthetho ngesa- ndla ngenxa yamahlebezi asabalalayo ngokufa kwakhe.
Kusolakala ukuthi ukubulawa kwakhe kuhlobene nepolitiki nenzondo ngaphakathi kukhongolose.
Kungakapheli isikhathi esingakanani eshonile, kusatshalaliswe isithombe sohlu lwalabo abehambisana nabo sesifakwe umfaniswano wenja esikhaleni ebesinesithombe sakhe.
Lesi sithombe esigxekwe kakhulu ngamalungu ophiko lwentsha kulesiya sifunda, sisatshalaliswe enkundleni yezokuxhumana ifacebook kungakapheli nosuku olulodwa kubikwe ngokushona kwakhe.
Umufi umnu Thobela ushona nje, ebethwelwe ngeqoma ngabathile ngaphakathi kukhongolose, bemfuna esikhundleni sokuba ngunobhala WE-ANC kulesiya sifunda ngemuva kwengqungquthela yalesi sifunda ezoba ngonhlangulana (June).
Abebemthwele ngeqoma bebephikisana nalabo abafuna kuqhubeke ubuholi bukamnu Zamo Nxumalo ongusihlalo wale nhlangano kulesiya sifunda, naye osigxekile lesi senzo kodwa wanxusa amalungu enhlangano yakhe ukuba angacasulwa yizigameko zabantu abangosomathuba, abazosebenzisa leli thuba ngokwenza izinto ezizoshiya abantu bekhombana ngoba bezama ukudukisa umkhondo ngokubulawa kukamnu Thobela.
“Siyawacela amalungu ethu ukuba anikeze ithuba amaphoyisa enze umsebenzi wawo wokuba kutholakale abathintekayo ekubulaweni kukamnu Thobela. Ekugcineni ababulali bazovela, thina konke sesikubeke ezandleni zikankulunkulu,” kusho umnu Nxumalo.
Umufi umnu Thobela ushonele esibhedlela eport Shepstone kusihlwa ngomgqibelo ngeledlule, ngemuva kokulalelwa unyendle ngumuntu ongaziwa, omdubule amahlandla amane ngesikhathi engena emzini wakhe ephuma emsebenzini.
Ilungu lesigungu esiphezulu se- African National Congress Youth League (ANCYL) kuzwelonke, umkhuseli Mlengane, ubhale enkundleni yezokuxhumana ngaphansi kwalesi sithombe wathi nakuba bebengafuni ukukholwa wukuthi ukufa kukamnu Thobela kuhlangene nepolitiki kodwa uma sekunezithombe ezifana nalezi “kwenza sicabange ngenye indlela, nokuthi yini ephoqe umuntu enze umfaniswano ofana nalo.”
Usihlalo WE-ANCYL eharry Gwala, umnu Zwakele Mngonyama, uthi bayacela ukuba amalungu kakhongolose ahloniphe umthetho.
Ngolwesine kube nenkonzo yesikhumbuzo sikamnu Thobela kanti uzongcwatshwa emzimkhulu ezinkundleni yezemidlalo.