Kufundiswa izisebenzi ngamalungelo
EZEMISEBENZI: Bazijwayeza ukwazi imithetho
UNKK Mildred Oliphant, ongungqongqoshe wezezisebenzi ( osesithombeni), ugqugquzela ukuba izisebenzi zazi ngamalungelo azo emsebenzini.
Lokhu kugqugquzela kwakhe izisebenzi kwandulela umgubo waminyaka yonke wosuku lwezisebenzi oluba mhla lulunye kunhlaba (May).
Kusasa njengoba luzobe lugujwa nje, kulindeleke ukuba izinkumbi zezisebenzi zihambele imigubho yalolu suku esezindaweni ezehlukene ezweni lonke.
Unkk Oliphant uthi kubalulekile ukuba izisebenzi zizejwayeze imithetho yezezisebenzi ezivikelayo. Uthi uma kukhona izisebenzi ezingakuqondi mayelana naleyo mithetho, bakhona bona njengomnyango wezezisebenzi, bazocacisa.
Umgubho omkhulu wosuku lwezisebenzi uzoba sebloemfontein kusasa, kanti kulindeleke ukuba umengameli wezwe umnu Jacob Zuma ethule inkulumo kulo mcimbi. Ukuba yingxenye yalo mcimbi kukamengameli Zuma kuqinisekiswe yi-african National Congress (ANC) kuzwelonke, ngemuva kwezinkulumo ezishayisanayo njengoba kukhona ezinye izinyunyana ezingaphansi komfelandawonye wezinyunyana, ico- ngress of South African Trade Unions (Cosatu), ezingahambisani nokuba umengameli Zuma abe yingxenye yalo umcimbi.
Kuzokhumbuleka ukuthi ngemuva kokuba umnu Zuma enze izinguquko kwikhabhinethi, ugxekwe nayicosatu, yaze yathi kufanele ehle esikhundleni sokwengamela izwe. Lezo zinyunyana ezingahambisani nokuba umnu Zuma ethule inkulumo kulo mcimbi, zithi ukuba yingxenye kwakhe, aphinde ethule inkulumo kuzokwakha isithombe esididayo njengoba icosatu iphumele obala ngokuthi makehle esikhundleni.
Phakathi kwalezo zinyunyana ezingafuni ukuba umengameli Zuma abe yingxenye yalo mcimbi yiNational Education, Health and Allied Workersí Union (Nehawu), Communication Worker’s Union (CWU), yiSouth African Democratic Teachers Union (Sadtu), necosatu egoli.
Kubikwa ukuthi inehawu ibhalele icosatu incwadi inxusa ukuba kube yisekela likamengameli, umnu Cyril Ramaphosa, ovala isikhala sikamnu Zuma. Esitatimendeni sabezindaba esikhishwe YI-ANC ngolwesihlanu, kubikwa ukuthi umnu Ramaphosa uzobe esehectorspruit, empumalanga.
Njengoba icosatu iphumele obala ngokuba umnu Zuma ehle esikhundleni, konokuqagula ukuthi kungenzeka angemukeleki kwabanye abazobe bewethamele, kusolakala ukuthi angase ahhahhanyezwe. Nokho I-ANC ithi kayikhathazekile ngokuthi umnu Zuma angase ahhahhanyezwe noma aphazanyiswe ngesikhathi ethula inkulumo yakhe.
Okhulumela icosatu, umnu Sizwe Pamla, uthe kabakwazi ukutshela I-ANC ukuba ithumele bani kulo mcimbi. Uthi isinqumo secosatu sokuvumela umengameli Zuma ukuba akhulume kulo mcimbi kasiphikisani nesiphakamiso secosatu sokuba ehle esikhundleni.