KUYAVALWA UKUNGENELA OWEZINDONDO ZAMAFILIMU
AKUSENSUKU zatshwala kuvalwe ukungenelwa komncintiswano wezamafilimu obizwa ngokuthi yisimon Mabhunu Sabela Film Awards.
Usuku olungumnqamulajuqu lokungenela lo mncintiswano wuLwesibili mhla zimbili kunhlaba (May).
Nonyaka lo mncintiswano uzobe wenzeka okwesihlanu. Kubikwa ukuthi yinqwaba yemingenelo esithunyelwe kusukela kuvuleke ithuba lokungenela.
Le miklomelo izonikezelwa ngesikhathi kuqhubeka umcimbi wezamafilimu omkhulukazi, idurban International Film Festival (DIFF) ozodonsa kusukela ziyi-13 kuya zingama-23 kuntulikazi (July).
Kulezi zindondo kuhlomula kakhulu abakwazulu-natal kodwa nabaqhamuka kwezinye izifundazwe abasuke begqamile ngaleso sikhathi kabasali ngaphandle.
Abahlomula kakhulu ngabadi- diyeli bamafilimu bebongwa emikhakheni ehlukene ngegalelo labo embonini yezamafilimu nekamabonakude.
Phakathi kwemikhakha okuncintiswana kuyo egqamayo kuba ngowebest Actor/actress, Best Supporting Actor/actress, Best Newcomer nowebest Director.
Kulo mncintiswano kubuye kuhlonishwe nezinsika noma izingwevu kwezamafilimu nakumabonakude Kwazulu-natal.
Umabhunu, okuqanjwe ngaye lezi zindondo, uyingqalabutho kwezamafilimu nakumabonakude njengoba ubengumlingisi, umqondisi nomdidiyeli oqede iminyaka eminingi kule mboni.
Kuleyo minyaka ubambe iqhaza kumafilimu angama-34 akuleli nangaphandle.
Kulindeleke ukuba nonyaka kunikezelwe ngezindondo ezingaphezu kwama-23 nokusho ukuthi amajaji asahlalelwe wumqansa wokuhlunga imingenelo.