AKEKHO OWAZIYO UMZUZU NEHORA LOKUHLWITHWA
AMAZWI akule ngxenye yezwi lenkosi sekuke kwaphawulwa ngawo phambilini kulo leli likamafukuzela.
Namuhla-ke senza lokho ngolukakhwini esingakubiza ngokuthi “update” ngalokho okwenzeka emiddle East, okuyingxenye yomhlaba enamazwe phakathi kwawo okukhona elakwa-israel nawomakhelwane balo.
Lapha sizochathazela abazalwane ngezakamuva ezenzeka kule ngxenye yomhlaba. Njengoba inkosi ujesu yakucacisa ukuthi akekho owazi usuku lokubuya kwendodana Yomuntu (esho yena uqobo) nalapha akushaywa wona umhlahlo wokuthi inkosi ujesu izobuya ngaluphi usuku.
Ngokweziphrofetho le ngxenye yomhlaba ebizwa ngempumalanga Emaphakathi (Middle East), singayifanisa newashi likankulunkulu ngakho-ke kusemqoka ukulandela okwenzeka khona ngoba kuyizinkomba zokuthi sezikuphi izinto manje. Inhloso wukukhuthazana ngokuthi unkulunkulu akalibele ngefa lakhe okuyibandla elingumakoti wewundlu ujesu Kristu - ithemba elibusisiweyo okulotshwe ngalo encwadini kuthithu 2:13.
Okunye okusanda kwenzeka kubonakala kunomthelela wokwenyukela kwelinye igiya kwesivinini sokwenzeka kwezinto ezingase ziholele ekubeni sibone kugcwaliseka iziphrofetho ngokushesha, ikakhulukazi kuleli vesi elishiwo ngenhla (Isaya 17:1) nalesi esiku Danyeli 9:27 sokusayinwa kwesivumelwano soxolo lwamanga.
Phela uma umphikikristu esehole izingxoxo zokuthula saze senziwa leso sivumelwano seminyaka eyisi-7, kuyothi phakathi naso emuva kweminyaka emithathu nengxenye asephule (Danyeli 9:27) ngokunqamula imihlatshelo neminikelo.
Abanye bakholwa wukuthi-ke uyobe esejikela amajuda, azibize yena ngokuthi ungumesiya (Daniel 11:31-32, 36-39). Bheka futhi kumathewu 24:15. Okusho ukuthike isikhathi senhlupheko enkulu siyobe singeyona iminyaka eyisi-7 kodwa siyiminyaka emithathu nengxenye. Empeleni ingxenye yokuqala yalesi sivumelwano so- xolo lwamanga iwukuqala kwemihelo (Mathewu 24:8), ngolukakhwini esithi “beginning of sorrows” ngoba emuva kwalokho kulandela inhlupheko enkulu (Great Tribulation) engakaze ibonwe phambilini nengaseyukuba khona futhi (Mathewu 24:21).
Izwi lenkosi kumathewu 24:22 lize lithi ukube lezo zinsuku ziyobe zngancishiswanga, akekho obeyobe esaphila ekupheleni kwazo, kepha ngenxa yabakhethiwe ziyofinyezwa. Ezinye izindawo ebhayibhelini eziveza lokhu yilezi: Danyeli 7:25, Danyeli 12:7; Danyeli 12:12; Isambulo 11:2; Isambulo 11:3; 13:5).
Wonke lawa mavesi ayaveza ukuthi isikhathi senhlupheko enkulu yiminyaka emithathu nengxenye eyisigaba sesibili seminyaka eyisi7 yesivumelwano soxolo lwamanga. Ngakho-ke iminyaka emithathu nengxenye yokuqala imele isigaba sokuqala kwemihelo ( beginning of sorrows) njengoba sekushiwo.
Njalo uma kukhulunywa ngalesi sikhathi sokuhlupheka okukhulu abazalwane abavumelanayo ukuthi kuyeza, kayisali impikiswano mayelana nokuthi ibandla liyohlwithwa ngaphambi, noma phakathi noma ekupheleni kwale nhlupheko enkulu ezayo.
Yilowo nalowo angasho akucabangayo ngendlela aliqonda ngayo izwi uma elifunda. Umbhali walolu daba yena uyibuka ngokunezela indima yezwi encwadini II Kwabase Korinte 5:20 lapho kuthi khona, “Ngakho singamanxusa kakristu ngokungathi unkulunkulu unxusa ngathi; siyanincenga esikhundleni sikakristu, sithi: ‘Buyisanani nonkulunkulu’.”
Uma kufufusa impi phakathi kwamazwe amabili, ngokuvamile izwe liyalibiza ukuba libuyele ekhaya inxusa lalo elisezweni elizolihlasela ukuze lingathelwa ngamachaphazelo.
Nonkulunkulu uma esezojezisa umhlaba ngenxa yokona, uyolihlwitha kuqala ibandla elingabazalwane ibhayibheli elithi bangamanxusa, ukuze bangangeni kulolo tavatava olubikezelwa yiziphrofetho. Obona ngenye indlela kulungile, yindlela naye abona ngayo. Kuyathokozisa nokho ukwazi ukuthi abazalwane bayavumelana ukuthi akekho owazi usuku nehora.
Okusemqoka wukukhumbula ukuthi usuku lokufa komuntu nomuntu alwaziwa kanti-ke indaba yomuntu nonkulunkulu ilungiswa nganeno kwethuna ngoba akukho ukuphenduka ngale kwethuna. Lokhu kwenza singabikho isidingo sokuzikhathaza ngalabo abazamayo ukushaya umhlahlo kodwa bageje mayelana nosuku lokubuya kwenkosi ujesu.
Izwe libiza inxusa lalo kuqala ngaphambi kokuhlasela.