5. UTHANDA INGANE KUNAMI
Dadewethu, abaziyo bathi kuhle empilweni ukuba uke uzinuke wena amakhwapha. Ngalokho ngane yakwethu ngiqonde ukuthi asikafiki isithandwa sakho ngoba uma sesifikile ngeke utshelwe ngabantu. Umuntu othi uma umbuza noma umtshela into engakuphathi kahle enhliziyweni yakho bese eyakwala futhi angafuni ukuba kwaziwe ukuthi niyathandana, abadala bayaye bathi uyinkatha yenkangala noma uyinqaba kayitshelwana.
Ngamafuphi nje dadewethu ubhekene nenkinga wena la. Umuntu akangeni enkingeni ebhekile. Ugade-ke ungalokhu ushintshashintsha ubudlelwane kanti uncengile ngoba badlala ngawe la emhlabeni. PASTOR, nginenkinga ngoyise wengane esineminyaka eyisihlanu sithandana naye. Uma ngibuza ukuthi uzimisele ngokufikaphi nalolu thando lwethu akaphenduli into ecacile.
Ngibona sengathi kumele ngiqhubeke nempilo ngoba sengathi uzithandela ingane yakhe kunami.
IMPENDULO: Dadewethu phela ingane yakhe ngamathumbu akhe. Yingakho eyithanda kangaka nje. Wena mhla esekuthanda uyokushada.
Asethembe nje futhi ukuthi awuzukuthola eyesibili ingane. Ungashadi kulo muntu onaye noma komunye uma ungalalelanga lawa mazwi engikutshela wona ngoba uyohlale ubalisa abantu baze bacabange ukuthi uphanjanelwe yikhanda kanti-ke nabantu besilisa bayothola intuba uma ingqondo ingasekho.
Phela ngumuntu lona obhekene naye dadewethu; banjalo-ke abantu. Isizulu sithi umlungisi uzithela isisila.
Cha dadewethu, akukubi kakhulu; hlalani phansi nixoxe nibonisane, umvezele ongakuthandi akwenzayo. Zinjalo-ke vele ezasothandweni. Mina nje ngikufisela inhlanhla, niqhubeke kahle othandweni lwenu nize nishade ngokuthanda kwenkosi.
Ungakhohlwa dadewethu ukuthi kayikho nkulu kangako le nkinga obhekene nayo; abantu babhekene nezinkinga la ngaphandle.
~ Kubo bonke abafundi bephephandaba lethu ILANGA, siyafisa ukuba sisizane futhi ngiyafisa ukuniphendula nonke kepha ucingo noma inombolo iyodwa, akulula ukunibamba nonke. Uma ufona uyizwa ikhala, ngesinye isikhathi ngisuke ngisakhuluma nomunye. Nixole kuleyo ndawo kodwa ngokushiya nje umqhafazo, siyakubeka nasemkhulekweni.
Upastor Sthembiso Zondo ngumeluleki nomethuli wezinkulumo ezakhayo. Wethula inkulumo ekhuthazayo ngolwesine bese ephendula imibuzo yabafundi ngezinkinga zempilo nezothando KWILANGA Langesonto.
Xhumana naye ku: 073 795 2292 noma kufacebook: Sthembiso Zondo Fan page noma kuwhatsapp: 082 070 8034. Abafisa ukukhonza nathi, bazosithola njalo ngeSonto ngo-10h00 kunombolo 110 Williams Road ngasedalbridge.