INGEBHE KWI-TOTTENHAM NGOMDLALO NE-ARSENAL
INGEBHE kumqeqeshi wetottenham Hotspur ngezakhe njengoba zizobhekana ne-arsenal kowebarclays Premiership namuhla ngesonto ngo-17h00 ewhite Hart Lane, okuyikhaya letottenham.
Itottenham isenalo ithuba lokunqoba isicoco seligi njengoba isezithendeni zechelsea eziholayo.
Ichelsea isesicongweni ngamaphuzu angama-78 emidlalweni engama-33, kuthi itottenham ibe sendaweni yesibili ngamaphuzu angama-74 emidlalweni efanayo. Ichelsea izodlala kuqala kunetottenham njengoba izobhekana ne-everton koweligi namuhla ngesonto ngo-15h00 ekomkhulu le-everton, igoodison Park.
Umauricio Pochettino ocija itottenham, uthi unovalo ngomphumela wechelsea ne-everton njengoba ekholwa wukuthi ungase uphazamise abadlali bakhe ngaphambi kwalo mdlalo nomkhaya basenorth London, i-arsenal.
“Ukuba kuya ngami le midlalo ibizogijinywa ngesikhathi esifanayo ngoba sisembangweni nechelsea. Njengoba izodlala kuqala nje kunathi uma ingehlulwa singaphazamiseka kakhulu ngoba abadlali bami bazofuna ukwenza ngokweqile ukuze behlule i-arsenal bese sigcina sesenza esingakuhlelile.
“Kanti noma inganqoba futhi ichelsea sizokuba nengcindezi yokunqoba ukuze silokhu sisezithendeni zayo.
"Kodwa-ke ngisebenza nabadlali abadala kufanele basiqonde isimo esibhekene naso futhi bakwazi ukumelana nengcindezi.
"Lo mdlalo uzokuba mkhulu ngoba owomkhaya kodwa noma kanjani kufanele siwunqobe. Sinalo ithuba lokusinqoba isicoco seligi kodwa konke kulele ekutheni senza njani kulo mdlalo,” kusho upochettino.
U-arsene Wenger ololonga i-arsenal, uthi abazukwenzelela kumuntu bona ngoba bafuna ukusonga kwi- top 4 ukuze badlale i-uefa Champions League ngesizini ezayo.
“Siyozidlalela thina kulo mdlalo, empilweni uyayilwela impumelelo yakho kawulindi ukuthi kube khona abakulwelayo. Okumqoka kithina wukuya kubona sibuye namaphuzu agcwele ngoba siyazazi ukuthi sifunani,” kusho uwenger.