Sebethembele emuthini ukuvika izembe
Phambilini bacele izibusiso EZCC
ISIBEKE ithemba emuthini ikilabhu evika izembe kwiAbsa Premiership okumanje ishaya ngonyawo phansi ukuthi ngeke nangengozi yehlele ehlathini.
Ibaroka FC izodudulana nebloemfontein Celtic kowe-absa Premiership namuhla ngesonto ngo-15h00 enew Peter Mokaba Stadium, epolokwane. Lo mdlalo umqoka ngendlela eyisimanga kula makilabhu njengoba elwela impilo yawo kulesi sigaba kwazise avika izembe.
Ibaroka isemsileni kanti iceltic isendaweni yesine uma usuka emsileni. Bashiyana ngamaphuzu amabili nje kuphela okusho ukuthi uma ibaroka inganqoba noma kanjani izophuma emgceleni wezembe.
ILANGA langesonto lixoxa nomunye umdlali webaroka, ongathandanga ukuba lidalulwe igama lakhe, uvele wagaba ngomuthi azwakalise ukuthi uphethwe ngezakhe ekhaya, wathi ngeke kuphume lutho.
Phambilini kuke kwavela ukuthi le kilabhu ibuye iyocela izibusiso nasezion Christian Church (ZCC).
“Uma kunje usebenzisa konke onakho. Kulokhu siphethe embi induku noma kanjani lo mdlalo sizowunqoba ekhaya ngeke kusaphuma lutho futhi ehlathini yilapho singeke siye khona. Emuva kwalo mdlalo sizokube sesiphume unomphelo emgceleni wezembe sebeyosala bebanga bodwa.
“I-orlando Pirates ibe nenhlanhla emdlalweni wethu nayo. Ngikholwa wukuthi kushiyane ukwenza yakhava sesizitshela ukuthi sinqobile kuba ngu-1-1. Kodwa- ke kulokhu siyadlula kumnyama kubomvu,” kusho lo mdlali obezwakala ukuthi uyethembile le nduku abekhuluma ngayo.
Ukgoloko Thobejane ololonga le kilabhu, uthi noma yikanjani bayaphuma emgceleni wezembe kulokhu. Indlela abafana abayiyona ejimini iyakhombisa ukuthi bafuna ukuyilwela imisebenzi yabo. Yilona thuba lokuphuma ezembeni leli kalikho elinye. Kodwa-ke kangingabazi ukuthi sizowunqoba lo mdlalo,” kusho uthobejane.
Ukhumbulani Konco oyisikhulu esiphezulu kwiceltic, uthi umdlalo webaroka ngeke ube lula kodwa noma kanjani bazobuya namaphuzu agcwele.
“Ibaroka idlala kahle ikakhulukazi ekhaya kodwa kasinalo uvalo ngayo noma kanjani sizowunqoba lo mdlalo.
"Nathi siyolwela impilo yethu, izembe liyasinukela yingakho sizofela enkundleni kulo mdlalo,” kusho ukonco.
Enye ikilabhu evika izembe yi-ajax Cape Town ezodudulana neplatinum Stars namuhla ngeSonto ngo-15h00 ecape Town Stadium.