Abasekzn bangancinda okuningi okuhle kumotaung nokhoza
KWESINYE isikhathi kuke kwenzeke isigameko okuthi sesenzekile ungakholwa ukuthi nguwena ngempela osibonile kumbe odlule kusona.
Ngikhumbula ngifika ebuntathelini ngokuqala kweminyaka yezi-2000, bengisebenza kwe-linye iphephandaba lesizulu eliphuma kanye ngesonto.
Ngifike ehhovisi ekuseni njengenjwayelo ngafunda imiyalezo, ngithole owesimemo sikasihlalo wepremier Soccer League (PSL) udkt Irvin “Iron Duke” Khoza.
Ubebiza isithangami sabezindaba kwelinye lamahhotela agudle ulwandle ethekwini kukhona ayezokumemezela ngecastle Premiership kwazise ngaleso sikhathi iligi yakuleli ibisekwe ngabakwasouth African Breweries (SAB) ngomkhiqizo wabo, icastle.
Ngiye kumhleli wami ucyril Madlala ngambikela, ungihlelele into yokuhamba nganikela khona. Endleleni bengingakholwa ukuthi yimina ozokuba segunjini elilodwa nokhoza, kwazise ungumuntu ebengingakaze ngikuphuphe ngisho ngilele ukuthi ngiyoke ngihlangane naye ngendlela ahlonishwa ngayo ebholeni lakuleli.
Kuthe engena egunjini ebesikulona ngaqhaqhazela kwabanda amathumbu ngingakholwa wukuthi ngukhoza lona engisendlini eyodwa naye.
Engixhawula engibuza ukuthi ngingubani ngoba uyabona ukuthi ngisemusha, ngiphendule ngezwi okubonakalayo ukuthi ngelomuntu othukile.
Kuthe sengixoxela abangani bami ngokungehlele bavele bangamukelisa ingilazi yobhiya obanda qa, bathi mangishaye ithamo ngoba bayabona ukuthi sengidakwe ngingakaphuzi.
Bagcine bengangikholwa ngoba bekuyinto ebibukeka ikude kabi nathi ukuhlangana nomuntu onjengokhoza.
Ngithi angenze lesi sibonelo nje, yingoba ngike ngathi ngihleli ngabuka i- log yenational First Division (NFD) neye-absa Premiership ngangakholwa engikubone kwenzeka emakilabhini akwazulu-natal.
Ngike ngacikica amehlo, ngawabukisisa kahle ama- log kwanzima ukukholwa.
Phela selokhu kusungulwe IPSL ngowe-1996 kuhlale kunekilabhu yakwazulu-natal okumbulwa kwembeswa kuyona, ilwa nokuvika izembe.
Ngikhumbula ngesizini yokuqala kuvulwe IPSL ye-1996-1997 imanning Rangers iba yizingqwele ukuthi Amazulu FC abedonsa kanzima alivika kukubi izembe.
Kule sizini kwenzeka okungajwayelekile emakilabhini akulesi sifundazwe futhi okunzima ukuthi kukholakale.
Ngesizini edlule imaritzburg United ivike izembe ngosuku lokugcina ihlula ijomo Cosmos ngo-3-1 e-olen Park. Nokho kulokhu ilwela ukungena kwi- top 8.
Nelamontville Golden Arrows kayenzanga kahle ngesizini edlule kodwa kulena ilwela i- top 8 iphinde izokuba kwi- semi final yenedbank Cup. Nakwinfd okuhlale kunzima emakilabhini akulesi sifundazwe kulokhu wonke enza kahle.
Ithanda Royal Zulu iqhwakele kwi- log kanti ngesizini edlule ibivika izembe kukubi. Kuzokuba yireal Kings United engomakoti beligi, Amazulu FC neroyal Eagles basethubeni lokungena kweyokuhlungela ukunyukela kwipremiership.
Cishe kuyaqala ngqa emlandweni WEPSL ukuthi wonke amakilabhu akulesi sifundazwe enze kahle kungabi khona neyodwa evika izembe.
Kodwa kubona bonke lobu buhle esibubona benzeka kule sizini - cishe osekusele njengamanje wukuthi la makilabhu ikakhulukazi abaphathi bawo babe nobumbano ukuvikela ibhola lakulesi sifundazwe.
Kubuhlungu ukuzwa isikhulu sekilabhu sikhuluma kabi ngenye ikilabhu yakulesi sifundazwe bebe bengomkhaya.
Bheka nje manje le nto eyenziwe yi-arrows ishiya izinkundla eziseduze naseLamontville okuyiking Zwelithini Stadium, emlazi, nechatsworth Stadium yayisa imidlalo yayo eprincess Magogo Stadium, Kwamashu, okuyinkundla esetshenziswa ngamazulu FC.
Nasemgungundlovu kunomoyana wokungenami kwemaritzburg ngokubangisana ne-eagles ngeharry Gwala Stadium.
Le nto iyizinkomba zokuthi kukhona ukungaxhumani kahle nokungahoshelani phakathi kwamakilabhu akulesi sifundazwe okugcina kubulala ibhola. Kuzofanele izikhulu zamakilabhu akulesi sifundazwe zithathe isibonelo kukaizer Motaung ongusihlalo wekaizer Chiefs nokhoza ohola i-orlando Pirates.
Amakilabhu abo ayizimbangi ezinkulu kodwa kaweve ehloniphana omunye nomunye uyazi ukuthi kufanele ahambe agcine kuphi yingakho nje emakhulu futhi ekwazi ukuheha abaxhasi ndawonye.
Bheka nje kulesi sifundazwe, wusuthu kuphela ikilabhu enabaxhasi amanye kuyawabhedela okuyisimo esingamukelekile.
Aze asizwe ngomasipala ngenxa yokuthi ayahluleka wukuheha abaxhasi abazimele.
Izikhulu zamakilabhu akulesi sifundazwe kusafanele zihlangane zihlale phansi zibhunge ukuze kulungiswe ibhola kulesi sifundazwe.
Lokhu okwenzeka kule sizini kungenzeka masizini wonke uma nje kungalunga izinhloko zamakilabhu akulesi sifundazwe zibambisane ukuvikela ibhola esifundazweni. senzos@ilanganews.co.za