Ichiefs ibhekwe yisambane kwiligi
Bacekele phansi umsebenzi omuhle kashabba
IPHUCWE iqatha emlonyeni ikaizer Chiefs ibanjwa yisupersport United ngo-2-2 kowe-absa Premiership izolo ngomgqibelo kusihlwa embombela Stadium, empumalanga.
Ichiefs yiyona ebone kuqala imbobo yamapali kulo mdlalo usiphiwe “Shabba” Tshabalala eshaya igoli ngomzuzu we-14 nangowama-35.
Awesupersport abhakuziswe ngumandla Masango ngowama-23 no-aubrey Modiba seliyozilahla kunina ngowama-90.
Igoli lesupersport lingene ichiefs isiqalile ukudlala ibuye izame ukuchitha isikhathi kwazise ibisibona amaphuzu esesemgodleni kanti kayibuzanga elangeni. Ushabba akawuqedanga lo mdlalo edonseka amamasela ngesiwombe sesibili okwenze waphuma kwangena ugustavo Paez.
Ukuphuma kukashabba kube nomthelela omubi kwichiefs kwazise ubeyihola ngobukhulu ubuqotho futhi beyicindezele isuperSport.
Ukuhluleka kwezimpofana ukuthola amaphuzu agcwele kulo mdlalo kuzishaye kakhulu izinhloso zale kilabhu zokuqeda isizini iphethe isicoco seligi kwazise sezisele ngamaphuzu amane kwimamelodi Sundowns eqhwakele futhi esanomdlalo esandleni.
Ichiefs isalelwe yimidlalo emine ukusonga isizini. Ichiefs kumele isole kakhulu ujoseph Malangoane oshwebe amathuba amaningi alula abezoyenza inqobe lo mdlalo ngembudlu. Ugcine ekhishiwe kwangena uwilliam Twala.
Ipolokwane City ishovele eduze kwehlathi ifree State Stars iyiguqisa ngo-2-1 kowe-absa Premiership izolo ntambama egoble Park. Ipolokwane inqobe ngamagoli kavusumuzi Mngomezulu elingene ngomzuzu wokuqala nelikarodney Ramagalela ngowama-43. Elestars lize nogoodman “Deco” Dlamini ngowama-38.
Iblack Leopards isuse Amazulu FC endaweni yesibili kwi-log yenational First Division (NFD) inqoba ngo-3-2 izolo ntambama ethohoyandou Stadium. Amagoli aqinisekise ukuthi ileo- pards inyukela endaweni yesithathu kwi-log ashaywe nguPhathutshedzo Nange ngomzuzu wama-23, umwape Musonda ngowama-33 nokhayelihle Shozi ngowama-84, kanti awosuthu aqhamuke ku-ovidy Karuru ngowesine nakumabhudi Khenyeza ngowama-54. Usuthu selubambe isine.
Ireal Kings ishayelwe ekhaya yiroyal Eagles kuba ngu-10 wegoli likasiyabonga Shoyisa aliqulele ngakubo ngomzuzu wama-61 izolo esugar Ray Xulu Stadium, eclermont.
Isiyonke imiphumela YENFD imi kanje: Leopards 3, Amazulu 2; Spurs 3, Milano 2; Stellenbosch 4, Mthatha 0; Mbombela 3, Santos 0; FC Cape Town 1, Cosmos 0; Kings 0, Eagles 1; Cape Town All Stars 1, University of Pretoria 0.