Sibhodla umlilo isikhulu
EZIKAQEDISIZUNGU: Sithi bangomafikizolo
SIVUTHA singabaselwe isikhulu samasouth African Music Awards (Sama), uthobela Dlamini, ngalabo abasisola ngokuthi sibulala imboni yomculo.
Uthi kunabazama ukudicilela phansi isithunzi sakhe ezinkundleni zokuxhumana njengoba kukhona abebemsola ngokwenzelela ekuqokweni kwamaciko aqokelwe emncintiswaneni wanonyaka obhekwe ngabomvu wamasama.
Uthobela ungusihlalo webhodi yamasama aphinde abe wumqondisi enkampanini yomculo, imabala Noise.
Umsindo usuke ngemuva kokuba kuvele izindaba zokuhoxiswa kwama- music video ezingoma ezimbili zikanasty C, ethi “Good Girls” nethi “Don’t Do It”, emunxeni webest Music Video ngoba kuthiwa zingene kungafanele.
U-nasty C ungaphansi kwemabala Noise, lapho uthobela eyisikhulu khona. Ukungena kwakhe ngefasitela yikho okuqubule izinsolo zokuthi kunokwenzelela, kwasolwa yena uthobela njengoba eyisikhulu sasemabala Noise.
Njengenhlalayenza-ke uma kukhona udaba olushisa phansi - abantu abapholisanga maseko, bamusho uthobela ezinkundleni zokuxhumana njengoba egcine ese- trenda kwitwitter.
Abanye bebemsola ngokubulala imboni yomculo ngenkohlakalo. Kukhona nabaculi abaziwayo abaphawulile kulezi zinsolo, besohlangothini lwabamsolayo nokho ngokuhamba kwesikhathi babuye ba- kusuka abebekubhalile.
Ethintwa YILANGA Langesonto ngalezi zinsolo abekwa zona uvele wabhoka ngolaka, wathi bonke abamsola ngalokhu akazukubanaka ngoba bayafika kwezomculo (esho abaculi abaphawulile), wathi futhi kabazi lutho ngomculo.
Ekhuluma ngokunengeka, utshele intatheli ukuthi yena useneminyaka engaphezulu kwengama-20 ekule ndima ngakho ngeke ezwe ngomafikizolo endimeni.
Uthe omafikizolo banomlomo omanzi kanti emakhanda kugcwele upende nenkungu yodwa.
Indlela abedinwe ngayo ubekhuluma engayiniki nethuba lokubuza eminye imibuzo intatheli.
Uqhube wathi ukungafundi kwalaba ababhalile ezinkundleni zokuxhumana kukhonjiswa yikho ukubhala ezinkundleni zokuxhumana ngaphambili kokwenza uphenyo olujulile ngezinsolo abambeka zona.
Uthi yena njengomphathi kwezomculo kuyamphoxa lokhu futhi kucacisa bha ukuthi basahlalelwe wumsebenzi omkhulu wokufundisa abantu abayizimfunda makhwela.
Uyalele intatheli ukuba ikubhale konke akushoyo, ingabi namahloni.
“Ngicela mfowethu ubhale njengoba ngisho ngoba ngifuna bonke laba abebeneka igama lami ezinkundleni zokuxhumana bangizwe kahle ukuthi ngithini. Kangibesabi bonke futhi ngifuna ukubhekana nabo ngqo ngamunye ngamunye kuze kuphele lokhu kuthathana kancane kule ndima,” kusho uthobela ngokudinwa.
Uthe bonke laba abaziyo abakhulumayo uzobavulela amaTwitter award ukuze ezobanikeza izindondo “zokuvuzelwa yimilomo”.
Kuzokhumbuleka ukuthi umsindo ngokuklonyeliswa kwezindondo usuke ngomcimbi wamametro FM Awards lapho abantu bebenganeme ngokunqoba kukanasty C ikakhulukazi emunxeni wesong of The Year, kwasolwa imabala Noise ngokuthi igwazile, ithenga izindondo.
Nodr Malinga uphumele obala ekhala ngokudla umhlanganiso kukanasty C. Abaqokwe kowamaSama bamenyezelwe ngeledlule.
Kuthe kungakapheli ngisho izinsuku ezintathu bemenyezelwe kwezwakala ukuthi abahleli balo mcimbi sebehoxise la ma- music video kanasty C.
Uthobela utshele ILANGA Langesonto ukuthi yena akangeni ekuqokweni kwabaculi kodwa ungusihlalo wamasama, wathi likhona ithimba elibhekene nomsebenzi wokuqoka abancintisanayo eminxeni ehlukene.
Phambilini uthobela uke wasebenza e-afrotainment.
Uthi ngesikhathi esebenza e-afrotainment ubevele engusihlalo webhodi kodwa kakukaze kube khona umsindo yize ebekhona amaciko ase-afrotainment abeqokiwe kumasama.
Uthi bonke laba abaziyo ababhalile kutwitter, bembeka kabi uzobathathela izinyathelo zomthetho.
Uqhube wathi yena akesabi muntu, wathi bazozwa sengathi bayasha kanti vele sebeshile.