Zizophelela etilongweni izinceku ngesono sokuhlobonga
AZIQAPHELE izinceku ezingabaholi bamabandla, isono sokuhlobonga sithe chithi saka, izilingo ziningi, kungenjalo ziyophelela etilongweni kuhlazeke ivangeli likakrestu.
Akusiye yedwa umphrofethi Timoty Amotoso osenkingeni efana nalena angene kuyo, ziningi izinceku ezidla zisule imilomo ezingakabanjwa. Ezinye ziyaziwa kepha amakholwa ayazivikela kanti ezinye ziququbele nawo amahlazo azo.
Eminyakeni eyedlule kwadumala umhlaba wonke isilingo sesinene siqumba phansi umvangeli Jimmy Swaggart waphesheya kwezilwandle. Owesifazane thizeni emlandela wagcina emthele phansi wajabula usathane. Kumele izinceku nabaholi bamabandla bazi ukuthi abazalwane kabazona izimvu zomhlatshelo, umsebenzi wabo wukubanakekela ngokweqiniso.
Kuyadumaza ukuthola abaholi besizakala ngosizi lwabazalwane abeza kubo ngethemba lokuthi bazosizwa kepha bazithole sebegamenxe ekuxhashazweni yizinceku. Sithi mazazi izinceku ukuthi njengoba zingabaholi nje zigcotshiwe, ugcobo lwazo luyisilingo kubazalwane ababuthakathaka abangakaqini okholweni.
Siyazi ukuthi abanye abazalwane yibo abafaka izinceku ezilingweni ngenhloso. Kubiza ukuba abagcotshwa baqine okholweni lwabo. Esikhathini esiningi konakala lapho abazalwane besimame beyobika izinkinga zabo kubefundisi noma kubaholi besilisa. Ezinye zalezo zinkinga kuba ngeziphathelene nezocansi.
Kuyenzeka umzalwane wesimame afune ukuyobika izinkinga zakhe kumholi ngasese bebobabili bengabonwa muntu, usathane athole ithuba kube mnyama amehlo adle isithelo esiphakathi nensimu umholi azisole selidume ledlula.
Amalunga angabazalwane awangesabi ukuzondwa yizinceku, uma kukhona okushaya amanzi awayiphahlaze indaba kungaze konakale. Kuvamisile ukuba abazalwane bafihle ngoba bethi bavikela isithunzi sebandla, bakhohlwe wukuthi isono siziveza sona ekugcineni.
Nengoma iyasho ukuthi akukho okufihliweyo okungeke kuvele obala. Uma kubonakala ukuthi umholi noma inceku ingene esilingweni kufanele izihoxise yona emsebenzini wenkosi, icele intethelelo.
Nakhona kakubona bonke abagcotshwa abangeniwe yizwi nakholwa ngo-kweqiniso kwabanye ukholo yibhizinisi. Beza beluhlaza benjalo bathi uma sebebona izingane zethu babone ithuba lokuzicekela phansi.
Ubonani enganeni eneminyaka engama-12 ungubaba omdala osho ngempandla esiyophuma esiphundu.
Sithi azigawule zibheke izinceku, uphumile umoy’omubi, uhambela phansi, uvula oziphu babefundisi. Izimpisi ezimbethe izikhumba zezimvu zizohlala obala.
Siyazi ukuthi abanye abazalwane yibo abafaka izinceku ezilingweni ngenhloso. Kubiza ukuba aba...