Isuse isidumo eyokuqedwa kuka-90%
Bathi bezingekho izikhalazo kusaphethe uhlaudi
BATHI nakuba bebengaqondile ukususa impi nodweshu abebetelekele inhlangano yokusakaza kuleli ngolwesine, isouth African Broadcasting Corporation (SABC) kodwa uma kufanele kubuyelwe ehlathini, ngeke bangabaze, kuyobanjalo.
Ngolwesine izinhlangano zomphakathi ezahlukene zihambisana namaciko ikakhulukazi abaculi zinikele ezindlini zokusakaza e-auckland Park, egoli, ziyophikisana nombono webhodi lesikhashana mayelana nomgomo ka-90%.
Lo mgomo owasungulwa nguMnu Hlaudi Motsoeneng eseyiCOO, unqumela ogodweni iziteshi ZESABC ngokuthi zidlale umculo wakuleli ongekho ngaphansi kuka90%.
Leli bhodi lesikhashana livele phambi kweportfolio Committee ngasekupheleni kwenyanga edlule nalapho lithe lisezinhlelweni zokuhoxisa lo mgomo njengoba le nhlangano ibhekene nezinkinga zemali.
Usekela Sihlalo walo, umnu Mathatha Tsedu, uthe phakathi kwemizamo yokuhlenga ISABC wukuqeda ngalolu hlelo ngoba imisakazo isilahlekelwe cishe ngu-r29m kanti ithelevishini isi- lahlekelwe cishe ngu-r183m. Leli bhodi eligcotshwe ngondasa (March) linikezwe izinyanga eziyisithupha ukuguqula isimo kule nhlangano.
Phakathi kwezinhlangano ebeziyingxenye yemashi yileyo eyeseka umnu Hlaudi Motsoeneng nefuna abuyiselwe esikhundleni, ifriends of Hlaudi, Citizen Action Campaign nezinye. Kucishe kwabanjwana ngezihluthu nabaqaphi bebhilidi lale nhlangano, abamashi befuqeleka ngaphakathi kodwa isimo sakhalimeka.
Phakathi kokunye abakhala ngakho (abebemasha) wukuthi ukuqedwa kwalolu hlelo kuzosho ukuthi ISABC izophindela emuva ikhokhele abaphesheya cishe u-r500m ngonyaka bese abakuleli begcina bethola ingxenye ewuR70m njengoba bekwenzeka phambilini. U-90% bathi ulekelela ukuqinisekisa ukuthi nezizukulwane zabo ziphephile, ziyahlomula.
Ekhuluma ohlelweni lwezindaba kwi-ann 7 uvictor Bogopane odume ngelikadoc Shebeleza, nongomunye wabaphambili ekulweleni amaciko uthe ukuvalwa kuka90% kufana nokufa kubona.
“Izifundiswa zikhuluma ngezimali, zikhohlwe wukukhuluma ngezinto ezithinta abantu baseNingizimu Afrika ngqo njengoba kwenza amanye amazwe azidlalela okwawo kuphela.
“Seyiphendulwe ipolitiki le nto ngoba nakhu nje yayiqalwe nguHlaudi. Lo 90% uvikela imindeni yethu, uvikele nomlando weningizimu Afrika. Basixoxe nobani lesi sinqumo sabo? Buka nje, ngesikhathi ephethe uhlaudi bekungenazikhalazo ezingangalezi esezikhona ezibhekiswe ESABC namamashi,” usho kanje.
Ublondie Makhene ongomunye wabaphambili kulo mkhankaso utshele ILANGA Langesonto ukuthi angabuyela ehlathini nakuba esenama-61 uma beqhubeka nalesi siphakamiso sabo ESABC.
“Njengoba sibanikile i- memorandum silindele impendulo zingakapheli izinsuku eziyisikhombisa ukuze siqhubeke nezinhlelo zethu. Bayabona manje nabo ukuthi babhekene nomkhiqizo ophilayo la ongumuntu, hhayi ICD.
“Nginabazukulu kuyimanje abenza umculo, nokuyiwo okumele ubanakekele nezizukulwane zabo. ISABC kayiqali namuhla ukulahlekelwa yimali, ibihlale ibheyilwa nguhulumeni. Yini eyenza bathi manje kwenziwa wu-90%?
“Banamanga! Singakumela lokho nasenkantolo. Nasehlathini singaphindela, bangazosidina la. Le ndaba ifana nse naleyo yo- mhlaba. Kasisabaceli manje, siyabatshela,” kusho umakhene obezwakala efuthelana egoqa yonke inkulumo ngokuthi “thokoza mkhulu.”
Uthi kumele bonke abantu basukume babeseke ngoba le ndaba kayikho nje mayelana nomculo kodwa ingokulahlekelwa komphakathi wonke. Okhulumela ISABC umnu Kaizer Kganyago, nokunguye omukele le memorandum, uthi kumele kukhunjulwe ukuthi ibhodi kalisebenzi ESABC, ngokugcwele.
“Ngibatshelile nayizolo (Lwesine) uma bethi bafuna ukunikeza ibhodi i- memorandum ukuthi yinto engeke yenzeke ngoba lihlangana uma kunesidingo. Bonke banemisebenzi ezindaweni ezahlukene.
Ngikhuluma nawe nje abanye bakwiworld Economic Forum nakwezinye izindawo. Angazi-ke ukuthi bazohlangana nini mayelana nalolu daba kodwa sibathumelelile le memorandum, sizozwa ngabo,” usho kanje ephendula ukuthi bazozimela na lezi zinsuku eziyisikhombisa abanikezwe zona.
zowakha@ilanganews.co.za