Bakhumelane umlotha Noise
Lokhu kwethuse abalandeli
KUSHUKUME inkundla yokuxhumana i-twitter, urikhado Makhado odume ngelikariky Rick ememezela ukuxolelana kwakhe nabemabala Noise.
Phambilini lo mculi wamangaza abaningi edalula ukuthi akasahlangani nenkampani abeqopha ngaphansi kwayo imabala Noise, abantu basala bezibuza ukuthi ngabe yini emxoshile.
Abemabala nabo bephendula besabisa nangokumbopha ngokwephula inkontileka abebeyisayinile. Yize noma imibuzo yayiminingi kodwa akekho phakathi kwabo oke waphumela obala ukucacisa ukuthi ligqabulwe yini igoda.
Maphakathi naleli sonto uriky ubhale kwi-twitter ukuthi impi isiphelile phakathi kwakhe nemabala Noise. Lokhu kwethuse aba- la-ndeli bakhe abaningi. Abanye be-bembuza ukuthi imnikeze malini imabala Noise ukuze ehlise umo-ya kwazise ubeshisa.
Abanye befake ama- meme, anobuso obukhombisa ukwethuka, betshengisa ukungayikholwa lento ayibhalile.
Uriky udalule ukuthi bakhethe ukuhlukana ngokuthula njengoba yena esezogxila enkampanini yakhe imakhado Makhado Agency.
“Ayisekho impi phakathi kwami nemabala Noise. Ngikhethe ukukudlulisa konke ngiqhubekele phambili. Umuntu nomuntu usezozisebenzela,” kuchaza uriky kutwitter wakhe.
Ubefake isithombe lapho ehlezi khona noreggie Nkabinde ongumphathi omkhulu wemabala Noise. Ethintwa YILANGA Langesonto ureggie ukuqinisekisile ukuthi sebethelelene amanzi, wathi bakhethe ukujabhisa izitha.
“Imabala Noise inezitha kanti noriky unezitha. Bonke laba bantu bese besizakele ngengxabano yethu. Sibone kungcono siyiqede ngoba ayisisebenzeli thina kodwa isebenzela izitha,” kusho ureggie. Uqhube wathi bazobe bejabula naye nje uriky emicimbini eminingi abanayo ngevodacom Durban July.
“Sizobe sigijima naye yonke imicimbi yethu ngojuly. Uriky umfana wami engimthanda kabi,” kuchaza yena.
Uveze ukuthi emicimbini abanayo ngojuly eyandulela umcimbi omkhulu, lapho bezoletha khona abaculi baphesheya abathathu kanye nabalapha emzansi abanohlonze.
Yize noma engabadalulanga ngamagama kodwa uthe bazokhipha isitatimende maduze nje esizobe siqukethe uhla lwabaculi abazobe bekhona.