ZINGUNDABIZEKWAYO EZIKA BUSANI-DUBE
UMBHALI wezincwadi eseziphenduke intandokazi kubantu besifazane uthi akafuni nokuyithi vu indaba yokuphendula izincwadi zakhe zibe yimidlalo kamabonakude njengoba kukhona abanaleso sifiso sokuba ziguqulwe.
Ududu Busani-dube ongumbhali wezincwadi ihlomu The Wife, Zandile The Resolute nenaledi His Love uthi okwamanje akazimisele ngokuphawula mayelana nokuthi unazo na izinhlelo zokushintsha izincwadi zakhe zibe yimidlalo kamabonakude noma cha.
Lo mbhali uthi usezinhlelweni zokukhipha incwadi yesine kuwona lo nyaka nokuyiyona into esemqoka kuyena.
“Okwamanje abantu basakuthokozela ukuzifunda izincwadi zami nokuyinto engithokozisa kakhulu. Ngiyazi ukuthi bakhona abanesifiso sokushintsha lezi zincwadi zibe kumabonakude kodwa kasikafiki isikhathi,” esho.
Uthi uma sesilungile isikhathi kuzokwenzeka lokho.
“Ngizokucacisa lokho ngokuhamba kwesikhathi,” eqhuba.
Izincwadi zikadudu seziphenduke izintandokazi ikakhulukazi kubantu besifazane njengoba bekhuluma ngazo ngapha nangapha ezinkundleni zokuxhumana. Lezi zi- ncwadi azikhiphe phakathi kweminyaka u-2014 no-2015 zikhuluma ngempilo yezelamani zakwazulu ezidabuka egreytown kodwa zakhulela eshowe ekhaya konina.
Lezi zinsizwa esezizinze egoli zisebhizinisini lamatekisi kanti ziyazifela ngamakhosikazi azo. Ududu uthi uyayithokozela intshisekelo ekhonjiswa ngabafundi bezincwadi zakhe futhi yikhona okumgqugquzelayo ukuba aqhubeka nokubhala.
“Okumnandi ngezincwadi zami wukuthi kazikhethi iphela emasini kodwa zingafundwa abantu abahlala emakhaya nalabo abahlala emadolobheni amakhulu. Azihambisani futhi nangamazinga empilo njengoba zingathokozelwa yiwowonke umuntu,” esho.
Ukhuthaze abantu ukuba bazifunde ngokulandelana kwazo ukuze bayiqonde ingqikithi yazo.