"ABACULI KUMELE BAFUNDE NGEBHIZINISI LOMCULO"
UMSUNGULI wejoyous Celebration, ulindelani Mkhize, othathwa njengenkakha emculweni uthi abaculi abaningi ikakhulu abazinze KwazuluNatal kusamele bafunde ngebhizinisi lomculo.
Umkhize, osanda kuhlonishwa yinhlangano yosomabhizinisi imzansi Business Forum, uthi kuyadabukisa ukuthi iningi labaculi bakulesi sifundazwe nakuba beshisa izikhotha kodwa izinkampani ezinkulu zisagqoza ukusebenzisana nabo.
Uthi lokhu kudalwa wukuthi iningi labaculi ligxile kakhulu ekukhiqizeni ingoma eshisa izikhotha kunokubheka indlela ezolenza lihlale isikhathi eside emculweni.
“Okokuqala nje izinkampani ezinkulu ezizimele aziweseki ngokwanele umaciko. Uma uyiciko kumele usebenze ngokuphindiwe ukuze zikwazi ukukuqaphela uma uqhathanisa nabezemidlalo abazitamuzelayo ekuxhasweni yilezi zinkampani,” kuchaza umkhize.
Uthi kuhle ukuba umculi abe nengoma eshisayo kodwa izinkampani azibheki lokho kuphela, zibheka ukuthi ngaphandle kwale ngoma eshisayo abantu bazobe besakukhumbula yini futhi besafuna ukukubona emicimbini.
“Iningi labaculi uma izingoma zabo zingasashisi izikhotha liyanyamalala emehlweni abantu kanti izinkampani azikufuni lokho. Zifuna ukuzimatanisa nomculi ongabhekile ukushisa kwengoma ukuze abe semehlweni abantu,” kusho le nkakha.
Ithi ngaphandle kwalokho, izinkampani ziyabheka futhi nendlela iciko eliziphatha ngayo.
“Abaculi kumele baziqonde ukuthi bangamabhizinisi ngakho kumele babe nohlelo lokukhuli- sa amagama abo abasebenzele futhi bangenzi izinto ezizobehlisa isithunzi noma ezizongcolisa amagama abo,” kusho umkhize.
Uqhube wathi likhona ithalente ethekwini namaphethelo kodwa abaculi bakuleli dolobha mabafunde ukuthi leli bhizinisi lomculo aligxilile emculweni kuphela kodwa ziningi nezinye izindlela zokwenza imali.
“Kumele babe nabaphathi abaliqondayo ibhizinisi lomculo. Le nto yokuthatha umngani wakho ukuba aphathe izindaba zakho njengomculi kuyabalimaza abanye ngoba abakuqondi okumele bakwenze ukuze bakhulise igama lakho ebhizinisini lomculo,” esho.
Inhlangano imzansi Business Forum eqhuba umkhankaso obizwa ngokuthi #Isupportblack Business isanda kuhlonipha umkhize nojabulani Zama wodumo lwendawo yokujuxuza Eyadini Lounge kanti mhla zingama-31 kwephezulu imemezele ukuthi izohlonipha ubasetsana Kumalo ozakhele udumo engumiss South Africa, osengomunye wosomabhizinisi abavelele eningizimu Afrika. Lo mcimbi wokuhlonipha ubasetsana uzoba seradisson Blu Hotel esandton egoli.
lucky.cain@ilanganews.co.za