Iqhaza labahola indumiso ezinkonzweni
UKUCABANGA ngenkonzo kuletha izithombe eziningi ngokwenzeka enkonzweni evamile.
Lokho kungaba umthandazo, ukucula kwebandla, yimibhedesho nemithemelezo ( liturgy), ukushumayela, wukunikela, usontosikole, yizimemezelo nokunye okuyimisebenzi yebandla. Empeleni zonke lezi zinto ziyafana nobizo kulowo osuke ebambe iqhaza kuzo futhi ozinikele ekubeni zenzeke kahle.
Namhlanje sibheka iqhaza labahlabeleli abahola indumiso enkonzweni, ikakhulukazi ngokwenkambiso yamabandla ensindiso - nakuba singazi noma likhona yini ibandla lamakristu eliyiphikayo insindiso, nokho okuwudaba lwangelinye ilanga lolo.
Kukhona-ke okuyizidingo ezithi azifane kwababambe iqhaza kwikhwaya lebandla ( church
choir), amanxusa ( intercessors) nezikhonzi (ushers). Sizokukha nje phezulu ngalawo maphuzu esinga- thi kunesidingo sokuwahlaziya bese kuba yilowo nalowo abone noma lokhu kuyafezeka yini empilweni yakhe njengoba ezikhethele ukuba ngumdumisi.
UBUNGCWELE
Njengakwezinye izingxenye zokukhonza esontweni, umbandela wokuhlala ebungcweleni yiwona ongeke wasala ngaphandle noma nini uma kukhulunywa ngomuntu ozinikele kule ngxenye yokukhonza unkulunkulu enkonzweni.
Njengoba umsebenzi wabo kungukuthwala ibandla lonke balenyusele kunkulunkulu ngokomoya, kusobala ukuthi nakanjani umdumisi kumele abe ngumuntu oxhumene nomdali ukuze indumiso yebandla lonke nayo ibe njalo.
Futhi-ke ukuze lokhu kwenzeke, indaba yobungcwele ayiqali iphelele endlini yenkonzo kepha nangaphandle kulindelekile ukuba ubungcwele buqhubeke ngaso sonke isikhathi.
UKULUQONDA UBIZO
Umdumisi ngumuntu okumele azazi kahle hle ukuthi ngokuba ngumdumisi, naye usobizweni. Ubizo alugcini ngokuba kumfundisi ebandleni, ngoba nalabo abenza eminye imisebenzi ebandleni basobizweni.
Futhi nalapho kwenzeka umuntu obe ngumdumisi engakashadi bese eshada, kumele lowo oshada naye aluqonde ubizo ukuthi alushadi.
Yingakho amaqembu abadumisi phakathi kwawo kukhona asebeshadile nabangakashadi. Lokhu kusiholela esigabeni esilandelayo ngezansi esimayelana nokuziphatha komdumisi.
IMPILO YOMDUMISI
Umdumisi empeleni akasiyena umdumisi ngoba kusenkonzweni kuphela, kodwa lokhu kuyindlela yakhe yokuphila ngoba uhlezi exhumene nonkulunkulu ngendumiso.
Kwabanye kuze kwambuleke nesiphiwo sokuqamba izingoma ezintsha bese lowo eba nomnikelo hhayi nje ebandleni lakhe kuphela kepha emzimbeni wonke kaNkulunkulu lapho esengumculi orekhodayo.
Kumele uvele umehluko ekuziphatheni komuntu oseshadile nongakashadi - umuntu kumele aziqonde ukuthi usekusiphi isigaba. Inkosikazi ingaziphathisi okwentombi, okuyisigaba asedlulile kuso, nentombi ingazinikezi amalungelo omuntu osengenile emshadweni. Okunye futhi wukuthi uma empilweni yomdumisi kuba khona okungahambi kahle unelungelo lokuba ahlale phansi aze abuyisane nonkulunkulu wakhe. Kanjalo nowesifazane ozithwele kumele azihlambulule ngokuyibika indaba yakhe kubaphathi besigaba akusona ukuze abe nethuba lokuphumula aze abuyele esebelethile. Lokhu kungenxa yokuba uma uwumdumisi kumele ube nesikhathi nonkulunkulu, uzile ukudla - ongeke ukwenze uma ukhulelwe.
UBUDLELWANO NOMOYA ONGCWELE
Ngenxa yokuba umoya ongcwele ekhuluma kumuntu, umdumisi kumele abe ngumuntu ohlala eyigeqile ngaso sonke isikhathi indlebe kamoya.
Lokhu kwenzeka ngokuba impilo yakhe yokuthandaza ihlale isendaweni yayo. Okungukuthi ongathandazi angeke alindele ukuba umoya ongcwele akhulume naye. Ukuthandaza ungaphezi nokudlinza ngezwi kuyisabelo somdumisi ukuze ubudlelwano bakhe nomoya ongcwele bungapholi.