Ngimfisela ukukhula uroger Sikhakhane
KUNENTATHELI yezemidlalo ecishe yaphelelwa wumsebenzi ngesikhathi esifanayo okuxoshwe ngaso uroger Sikhakhane kwichippa United kasiviwe “Chippa” Mpengesi ngonyaka wezi-2015.
Isisusa sezinkinga kule ntatheli kanjalo nakusikhakhane kube wumcimbi wokugubha ukuqeda iminyaka ethile kwalo mqeqeshi osanda kujabulisa abathandi bakanobhutshuzwayo abaningi bakwazulu-natal enyusela ithanda Royal Zulu kwi-absa Premiership. Lo mcimbi wabe ungolwesihlanu kwenye yezindawo eziphambili enyakatho yetheku.
Ezinye zezimenywa kulo mcimbi zazingithumelela izithombe ezihehayo, kucaca ukuthi kukhonjwa ngophakathi. Inhloso yalokhu kwabe kuwukungidoba ukuba ngiveze ubuso nxa sengiphumile emsebenzini. Nokho isimo kasivumanga.
Ngakusasa (ngomgqibelo) ngivuswe yimiyalezo efonini ingazisa ukuthi kusasindwe ngobethole. Ngifika emsebenzini ngithole umyalezo kwenye yezintatheli esezimnkantshubomvu kwezokulotshwa kwezindaba zemidlalo.
Ibingazisa ukuthi iphuthuma ukuyotakula ethile ebisigebele ekwenzeni iphutha ebelizoyikhipha ngesango lapho iqashwe khona. Ibizibona ingakwazi ukushelelisa ipeni ipetukile. Ngesonto ichilli Boyz ibinomdlalo wobungani e-eastern Cape.
Ngithole olunye ucingo ngesonto kwesinye isimenywa singibuza ukuthi kangifikanga ngani emcimbini othathe izinsuku ezimbili. Sithe bebesazitika ngobumnandi nangawo umgqibelo kwaze kwakapakela kwesikabhadakazi.
Kangifuni-ke ukungena emininingwaneni ejulile ethinta ukuthi ubani wasuka ngasiphi isikhathi eselibangisa kuphi kodwa kulabo abaneshwa njengami lokusebenza ngezimpelasonto, kwakumele bazi size ngokucela odokotela babo ukubenzela izincwadi zokungabi sesimweni sokusebenza.
Nxa imali kadokotela ingasekho, abanye-ke kabenqeni ngisho “ukuyongcwaba ogogo nomkhulu babo” uma sekunzima, sekumele baqhamuke nezizathu ezizwakalayo zokungafiki emsebenzini.
Nokho usikhakhane “uwuhloniphile” umsebenzi wakhe kwichippa walibangisa khona. Sekuwumlando ukuthi yisiphi isizathu axoshelwe sona kule kilabhu ephila ngokupheka ithulula kubaqeqeshi njengoba nodan “Dance” Malesela ongene endaweni yakhe elengela eweni.
Usanda kunikwa ikhefu elikhe- thekile.
Amangwevu kasikhakhane kangiwangabazi nakancane ekulolongeni esigabeni esikhokhelayo kodwa ngikholwa wukuthi impumelelo yakhe incike kakhulu nasohlotsheni lwabangani achitha isikhathi esiningi nabo.
Eminyakeni edlule i-orlando Pirates ixoshe uviktor Bondarenko waserussia obenza kahle. Nokho imchithe ngezinsolo zokuziphatha budlabha phambi kwabadlali.
Mangikugcizelele lokhu, kangishongo ukuthi usikhakhane akaziphathi kahle, kodwa ngikholwa wukuthi uhlobo lwabangani achitha isikhathi esiningi nabo yilona oluzohlahla indlela ebheke empumelelweni yakhe kulesi sigaba. Ngimfisela inhlanhla esigabeni esikhulu. Ngikholwa wukuthi nabaphathi bethanda bazomeseka ngokugcwele ukuze le kilabhu izinze kulesi sigaba. Nokho ezinqumweni abazozithatha kuzomele bakhumbule ukuthi inkalankala izala inkalankala.
Ifana nesekisi eyokubuyiswa kwabaxoshwe kwibafana
Ukumenyezelwa kukastuart Baxter njengomqeqeshi omusha weBafana Bafana kushiya imibuzo eminingi ngobuholi besouth African Football Association (Safa).
Ibhola lakuleli libukeka lilokhu lishudula ndawonye. Ubaxter ngokwami uzifanela no-ephraim “Shakes” Mashaba nje lo osanda kuxoshwa yisafa. Bobabili banikiwe ithuba phambilini behluleka, babuyiswa.
Ngiyafisa ukwazi ukuthi yini lena entsha ebonwe yizikhulu zesafa kuBaxter manje, lena esihlukile kuBaxter oxoshwe eminyakeni eli-10 edlule. Kodwa-ke kumele simeseke ngethemba lokuthi ikhona injabulo asiphathele yona kuleli qembu lethu lesizwe eselehlelwe yisithunzi ngendlela exakile.