Uyahamba kwisibaya
EZOSAZIWAYO: Uzweli uzoqhoqhobala esobukhosi
KUZONYAMALALA abalingisi abanohlonze emdlalweni owuchungechunge Isibaya, otshengiswa kumzansi Magic ngo-20h30 kusuka ngomsombuluko kuya kulwesihlanu, othandwa yizinkumbi zabantu.
Imithombo engashayi eceleni YELANGA Langesonto ithi ujessica Nkosi, olingisa indawo kaqondi, uzonyamalala kulo mdlalo izinyanga eziyisithupha. Ngokusho kwalo mthombo, ngokomdlalo lo mlingisi uzofikelwa yincwadi yokwamukelwa esikoleni saphesheya kwezilwandle lapho abekade efake khona isicelo eminyakeni eyedlule.
Lokhu kuzokwenzeka ngesikhathi esihle lapho uzweli, oyinkosi yasebhubesini, esabuyile ukuzolungisa izinkinga zengane yakhe. Umthombo uqhuba uthi uqondi uzobe esecela uzweli ukuba athathe isikhundla sobukhosi okwesikhashana njengoba yena kumele alibangise phesheya ukuyoqhuba izifundo zakhe.
Lezi zifundo kubikwa ukuthi zizomthatha izinyanga eziyisithupha. Leli phephandaba alikwazanga nokho ukuthola ukuthi ngelani leli khefu elithathwa nguqondi.
Eminye imibiko iveza ukuthi noceleste Ntuli, olingisa indawo kasiphokazi, uyahamba kulo mdlalo. Lixhumana naye uceleste, ILANGA Langesonto uthe yinqwaba yabantu abambuza ezinkundleni zokuxhumana ngokuthi ushiya ngempela yini kulo mdlalo.
“Abantu abehlise amaphaphu, ngithatha ikhefu njengawo wonke umuntu, kangiyi ndawo. Isibaya sesiyi- soapie, abantu bayaphuma bayangena abanye baye ekhefini,” esho.
Uthi kumjabulisile ukuba axhumane ngale ndlela nabalandeli bakhe. “Abantu bayangithanda futhi bayayijabulela nendawo engiyilingisayo, lokhu ngikubone ngemiyalezo ebengiyithola ngesikhathi bezwa lezi zindaba,” esho.
Lo mlingisi, owaziwa kakhulu emkhakheni wezamahlaya, wenqabile ukuphumela obala ukuthi ngabe ikhefu lakhe liqala nini nokuthi liphela nini.
“Ngeke ngikwazi ukukuveza lokho ngoba akukho osekuphothuliwe, ngisesezingxoxweni nabaphathi bami,” kuqhuba yena.
Uceleste uthe uthatha ikhefu ngenhloso yokuba agxile emahlayeni, umatasa nomjikelezo wokuvakashela amadolobha ehlukene ehlekisa abantu ngaphansi kwesihloko esithi Black Tax.
Okhulumela isiteshi sakwaM-net, unondumiso Mabece, uthe: “Besingakezwa lutho ngokuhamba kukaceleste. Imibiko ethi ubhale enkundleni yezokuxhumana ngalokhu kasazi lutho ngayo, kungamele kubuzwe yena uqobo,” kusho yena.
Ephawula ngezinsolo ezithinta uzweli noqondi uthe: “Emdlalweni onjengalona kuba khona ushintsho kubalingisi nangendlela umdlalo obhalwe ngayo. Izindawo ezidlalwa nguAndile noqondi zincikene nga- kho-ke ukuze umdlalo uqhubeke kumele kube noshintsho ezinyangeni ezizayo.”