Imbewu yokupha ivame ukuba nezithelo ezinhle
KUNINGI ebesingakhuluma ngakho namhlanje, kwazise sisezinsukwini lapho kuhlangene imiqondo nobuholi bezwekazi i-afrika. Kodwa ngithe angithinte nalu udaba olubalulekile nalo kulo izwekazi i-afrika. Udaba lokupha nokusekela abanye abantu, kanjalo nezinye izizwe.
Ukubaluleka kwale mbewu yokupha, kubonakala kubantu abaningi abakwenzile ngaphambilini, laba bantu bathola ukuhlonishwa emhlabeni nasemazingeni ahlukene.
Ukupha ungakuhlukanisa ngezindlela eziningi.
Ungapha ngesikhathi sakho, ngokuba usize umuntu noma abantu abathile ukwenza lokhu abangakwazi ukuzenzela khona, kungaba ukunikela ngolwazi kulabo abadinga ulwazi okunguwena kuphela ongaba nalo ngaleso sikhathi. Kungaba wukunikela ngezinto eziphathekayo abazidingayo empilweni yabo, kumbe kube wukubavulela iminyango lapho bona bebengeke bakwazi ukuzivulela khona.
Le mbewu yokupha uyitshala kanye ibonakale ithela izithelo eziphindiwe. Imfihlo yokuqonda le mbewu, ingukuthi konke okwenzayo usuke ungakwenzeli nje lo muntu osuke uyitshala kuye kodwa usuke uzenzela wena ngoba imiphumela yalapho iyobe isithokozelwa nguwe ngokubona imiphumela yembewu owayitshalayo, isibonakala ikhulile, yaba yisivuno esikhulu.
Lokhu siyakwazi, njengophawu lobu-afrika.
Bekuyaye kuthi uma umuntu ebonakala ehlwempu emphakathini kodwa kube khona abazomsise- la ngezinkomo ukuze aqale naye afuye, zizalane nezinkomo, kusengwe kudliwe amasi kodwa futhi lo mnumzane obekade ehlwempu abonakale naye esehloniphekile ngesibaya endaweni.
Lolu phawu lungezinye ezingeke zaqhathaniswa nalutho kubantu bonke emhlabeni, nokuthi ukhuluma ngalo bese ama-afrika aphuma ame wodwa qekelele, ngokwenza okukhethekile.
Enye yezinto ongelula kuyo isandla njengophawu lokupha, kakhulukazi ezwenikazi i-afrika, elibonakala libuye likhungathwe yizimpi ezingxenyeni ezithile zalo, wuxolo. Ukutshala uxolo njengesipho, ikakhulukazi kubantu abakonile, kwenza ukuba uhambe uzisuse wena ijoka lenzondo namagqubu kodwa uzilungiselele impilo elula engenasisindo.
Utata unelson Mandela ungomunye wabaholi base-afrika, owaba nomthelela emhlabeni jikelele, ngokuba yisibonelo esihle ekuletheni uxolo kubantu abehlukahlukene emhlabeni.
Okubalulekile ngalesi sipho soxolo wukuthi kumele ungazenzisi ngaso kodwa kube wukuthi sijulile enhliziyweni yakho.
Phela ubaba umandela lo moya wakhe wokupha uxolo, nothando, waziwa ngakho emhlabeni wonke, esaphila ngokwenyama futhi lokho kwamzuzela ukuhlonishwa okukhulu.
Phakathi kwezinto esizifundayo kuyena yilokho kokuthi uma unalesi sipho usukunyelwa abanye abanomuzwa ofanayo nowakho yingakho ubekwazi ukumemeza kusabele abaholi bomhlaba.
Omunye esimaziyo emhlabeni wonke futhi ngumama Theressa, owaziwa kakhulu ngokunakekela abantu abahlwempu nabangakwazi ukuzenzela.
Isizathu esenza ngikubalele laba bantu wukuthi ngifisa ubone ukuthi ukutshala le mbewu yokupha kunomthelela omuhle kubo abantu abayitshalayo.
Inselelo engikuphosela yona, yileyo yokuba nawe ake uqale ukwenza utho, utshale le mbewu yokupha, kakhulukazi ukupha uxolo, ukuthula, nothando.
Konke okwenzayo usuke ungakwenzeli lo muntu osuke uyitshala kuye...