Masipheze ukuxuba izinkolo
MHLELI, kangiyena umuntu ojwayele ukucabanga aze aphimisele kodwa namhlanje sengithathe isinqumo sokuba ngihlabe phansi ngedolo ngishishilize ngosiba phezu kwaleli phepha lami elibalulekile, ngikuvulele isifuba kule nkundla ebekelwe thina bafundi belakho lodumo. Ufufunyane engilukhombisa kule ncwadi kaluhlobene nomsebenzi engiwenzayo kodwa liwukuzinkankanyela kwekhanda lami ngokuzimela gelekeqe. Ngiphakanyiswa yinkulumo eke yethulwa ngusolwazi Nakanjani Sibiya kweminye yemicimbi, uma ngingaphosisi bekuwunhlolanja (February) sisebulwer, phansi kwezintaba ezimangelengele zondi nokhahlamba uma ulisingisa ngasentshonalanga yesifundazwe esisakhele.
Umfo kasotobe wathi enikwe ithuba ezokhuluma ngokubaluleka kolwimi lwesintu wavele wakhetha ukukha phezulu ekhuluma ngokubaluleka kolwimi lomdabu, yize akha phezulu lo mbhemu oyidlile incwadi kodwa wakhikhiliza ulaza lodwa, waluphakela ababekhona, usuyabona-ke ukuthi ukukha phezulu kungenzeka kwesinye isimo kungachazi ukunyanyalata kodwa kusho ukuthi ushaye iziqhova ezinonile zodwa, washiya lonke uvucu olungenakunambitheka okutheni.
Ngaphambi kokuba nginkondloze uze usale emnyameni Mhleli nabafundi belakho likamafukuzela onjengohlanya umfo kamapholoba, usibiya wathi izinto eziningi eziphambi kwethu siyaziziba, kasizibuzi ukuthi kungani zinjalo. Le nkulumo kasotobe ngayihalela ukuba izwiwe nangabanye abantu.
Empeleni ngimbiza ngeqhude umfo kasotobe, ngithi makayishicilele ike ifundwe yisizwe ngenxa yokuthi mina ngiyidliwa, ngeke ngenze ubulungiswa uma ngingathi ngiyayiphaka samfudumezo. Yize ngesaba ukushaya amavenge enkomeni eyahlatshwa ngusibiya kodwa phakathi kwezinto azibeka wabuza ukuthi UNJ ezimotweni zakwamashu usho ukuthini? Wabuza ukuthi ub osekugcineni ezimotweni zamaphoyisa kuleli zwe umeleni? Waqhubeka wabuza nokuthi nerama asizibuzi ukuthi kwakuyini leyo okwagcina kuqanjwa ngayo lesi sigcobo esibhixwa esinkweni nosekwaba yigama okubizwa ngalo wonke amafutha ezinkwa. Kungalesi sizathu ngithe selingamane lidume lidle iminga nemisasane kodwa mina mfo kankunzebomvu sengiyayiqhatha le mpi okudala ilwa ekhanda lami.
Kubangelwa yini ukuba uma singcwaba emizini yobaba kube nemingcwabo emibili ngesikhathi esisodwa kodwa isidumbu sibe sisinye? Kudalwa yini ukuba luphume kabili udwendwe izinsuku zilandelana kodwa abahlanganiswayo kube kusengabantu ababodwa?
Kubangwa yini ukuba ibe mibili ngelanga elilodwa imicimbi yokukhulisa intombi kodwa ibe iyinye intombi ekhuliswayo noma ebongwayo ngokuziphatha kahle? Ngaphambi kokuba uthathe isiheshe sakho Mhleli uyishumpule le ncwadi ngivumele ngithi ukwenaba kancane. Yithina kuphela ma-afrika amahle othola ukuthi isidumbu sikhishwa abantu ababili size siyotshalwa phansi omunye ebiza ithongo lamajuda omunye ebiza ithongo laloyo osuke eseye koyisemkhulu, nokhulukhulwane bakhe emngcwabeni owodwa. Kuthi kuphethwe umphafa/umlahlankosi, ngapha kuphethwe incwadi emnyama emlomo ubomvu.
Umfundisi umpongoloza phezu kwesidumbu athi usephumule umphumulela wafuthi, ulinde ukuvuka mhla kubizwa ibandla ngisho kumuntu ongasonti, abe umuntu wakubo kamufi ethi mhlangabezeni nina bakubo esho izithakazelo noma amagama amakhehla asahamba nelakhe umufi. Omantombane bami bangitshela ukuthi lokhu kuwuphawu olugqamile olusho ukuthi abanye bethu abaqinile okholweni lwabo ngakho bancelisa amawele.
Mina ngihlale ngisho ukuthi mhla ngahamba emhlabeni singalinge siyiswe esontweni noma enkonzweni isidumbu sami ngoba angisonti futhi angifune mfundisi oyoma phezu kwengcwaba lami athi uthuli othulini kepha ngifuna ukuholwa abakwethu ngehubo lomndeni elithi, “Zinamandla lezonkomo zendlovu yakwashangase”, baze bayongibeka emalibeni akwethu ngaphandle komfundisi.
Udokotela Nokuzola Mndende, ophethe isikhungo Icamagu kwelakwaxhosa, naye uke wayiveza le nto engiyishoyo kodwa akukhona ukuthi mina naye sixabana nenkolo ethize, wukuthi-nje asisonti kwaphela.
Angikhulume ngomshado noma udwendwe - kukhithizwa ngemali eshisiwe kuthengwe izingubo kuqashwe amahholo ngisho nomfundisi imbala, kuyaqedwa lapho sekuyoqalwa phansi esigcawini kodwa sekwenziwa ngesintu.
Usuyabona ukuthi thina siyabhangqa kodwa laba abafika nale nkolo abayibhangqi imicimbi ebalulekile. Bekunganjani-ke sikhethe indlela eyodwa, uma usushaya ngesilungu nesikholwa esihambisana nebhayibheli yenza sona usiqedele ungasibhanqi nesintu. Kuyangicika ukuthi lokhu kwesintu kuba sengathi sekugcinwa icala ngoba okunikwa isikhathi esanele kuvamise ukuba okwesilungu noma okwesikholwa. Yiyo le nto eyenza abantu bathi ziyadula izinto zethu yingoba siyathembuza uma sigcina lezi zidingo.
Ngisho abantu bethatha uhambo oluya entweni ethile baguqa phansi babize owasenazaretha qede bashunqise impepho babize izinyanya. Bakwethu ake senze kube kunye, uma sishaya ngesintu asishaye ngaso, uma siya esilungwini esinamathelene nenkolo yebhayibheli asishaye ngaso futhi.
Ngiyazi kukhona abazongizwa kodwa abanye bazocabanga ukuthi ngithi asibuyele eminyakeni engamakhulu amahlanu ngaphambi kokufika kwabelungu kanti cha ngithi asihambeni nokukodwa hhayi le nto yokudideka. Yingakho abantu sebazila ngezingubo eziluhlaza bethi yisintu kodwa kahle kahle yisikholwa leso.
Ngiyavuma ukuthi isintu siyathuthuka kodwa asithuthuke ngendlela yaso hhayi eyame enkolweni okungesiyo eyomdabu. Hhayi-ke sengikulungele ukubhaxabulwa ngoba ngiyazi kukhona asejahe ukugadla kwezami izinduku nakuba ngingaqonde kubhula sihlangu kodwa ngithi asiyixoxe le ndaba, ngingangani.