Asilubone uguquko lomnotho kuleli
YINHLE le nto ekhulunywa ngosopolitiki nsuku zaphuma, i-radical economic tranformation”, okusho ukuguqulwa komnotho ukuze uhlomulise nabamnyama abebencisheke amathuba phambilini.
Cishe leli gama, elibuye libizwe ngezinye izindlela, silizwa belimemeza kusukela ekuseni kuphuma ilanga lize liyoshona. Siyavuma, kusemqoka futhi kubalulekile ukuba bonke abantu bahlomule emnothweni wezwe, kungahlomuli nje kuphela abathile.
Futhi-ke phela sesiside lesi sikhathi iningizimu Afrika ithole inkululeko, bonke abantu kufanele bahlomule emnothweni wezwe, kungadli nje ongxiwankulu kuphela.
Kumele kube nomehluko endleleni abantu abamnyama abahlomula ngayo manje sekuwuhulumeni wentando yeningi, nohulumeni wangesikhathi sengcindezelo.
Sithi-ke i-radical economic transformation makungabi nje yitemu abantu abafuna ukugqama ngalo, okugcina kuphenduka isitayela ukulibiza.
Labo abakhuluma ngalo kumele baliqonde ukuthi lisho ukuthini, baqhamuke namasu aphusile ukuguqula umnotho wezwe ukuba uhlomulise bonke abantu kuwo wonke amazinga empilo.
Phela kungenzeka ukuba abanye abaholi bepolitiki bayalisho nje kodwa ngempela ngempela kabaqondi ngokupheleleyo ukuthi yini ngempela le abakhuluma ngayo.
Futhi makungabi nje yindlela yosopolitiki yokuzama ukuzisondeza kubantu ngoba befuna ukuthandwa, bezama ukwenza abantu ukuba babone ukuthi bayabacabangela.
Noma sikuqonda ukuthi le “radical economic transformation” akuyona into esizolala namhlanje sivuke kusasa isiyenzekile kodwa sithi sifuna esikhathini esizayo ukuyibona yenzeka ngoba uma ingasenzeki iyosusa isiphithiphithi.
Masikhumbule ukuthi kusuka imibhikisho eshubile nje ye-#fees Must Fall kwakuqale kancane njengayo indaba ye-radical economic transformation - abaholi bezepolitiki bethembisa imfundo yamahhala kodwa manje osekuxaka abantu wukuthi sekuphele iminyaka engaphezu kwama-20 singafezwa leso sethembiso.
Yiso kanye-ke leso sizathu sokwethembisa izinto bese zingabe zisenzeka okususa isiphithiphithi ezweni.
Siyethemba futhi ukuthi akuphushwa nje le radical economic transformation ngenhloso yokuhlomulisa osipecelengwana abazana nosibanibanyana abasemandleni kuhulumeni. Siyakhuza ukuthi le radical economic transformation mayingabi yindlela yabasemandleni yokwenza inkohlakalo. Inkohlakalo yiyo kanye ebulala izwe lethu.
Abakhuluma ngalo kumele baliqonde ukuthi lisho ukuthini, baqhamuke namasu aphusile ukuguqula umnotho wezwe ukuba uhlomulise bonke abantu.