OMEDEMU ABABAFUNI ABASIZI ABANGANGABO
AFIKE-KE umsizi wasendlini noma umzanyana, aqale ngeliphezulu igiya ekhwishizela, ethintitha umntanabantu uze umkhuze kokunye uthi ake aphumule, kanti we! Sewuziyalile-ke.
Kuyothi kuphela inyanga usekhohlwe nya ukuthi konje akavakashile, uzotohoza. Kunzima nakakhulu uma nilingana ngokweminyaka ngoba usheshe afune ukufana nawe, okungeyona nokho into embi kangako ngoba kukhona le nto okuthiwa yi-role modelling, okuchaza ukuthi kusuke kumele ujabule uma kunomuntu ofisa ukufana nawe ngoba kusho ukuthi kunokuhle akubona kuwe.
Indaba yonakala uma sekumele ukhumbuze umuntu ngomsebenzi wakhe wansuku zonke. Kule misebenzi yasemahhovisi kukhona la othi uma usazincengela ufuna itoho ubhale kwicv ukuthi wena ungumuntu okhonze ukwenzisisa umsebenzi, kawudingi ukulandelwa ngemuva. Nokho-ke kuyo yonke imisebenzi sisho njalo, siqede singafika sishintshe, siqalaze izinduna ukuthi zingakuphi ukuze sidoje.
Omunye wozakwethu uthi kwadingeka aze acacisele umsizi wakwakhe ukuthi makangagadi yena, makanake umsebenzi ngoba ebona ukuthi uma engayile emsebenzini umsizi naye uzithela ngabandayo, azivukele emini. Uthi wamtshela ukuthi: “Lalela-ke sisi, mina la ngisebenza khona umphathi wami uke avele aqukule isikhwama sakhe ayozidlalela igalofu emini kwa-bha. Ngiyaye ngingagadi yena, ngiye ngiqhubeke nowami umsebenzi ekhona noma engekho, ngakho makungathi uma ngingasebenzi ngolwesine bese uyekelela umsebenzi wakho kimi ngoba ngidinga ukuphumula njengoba nawe ugoduka uyophumula ngezimpelaviki.”
Kangiyiboni iyinkinga le ngxoxo ngoba vele angithi uqasha umuntu ngoba udinga umsizi ozokwelekelela izinto zakho zibe lula ekhaya ukuze wena ugxile ekuhubheni otiki kudliwe ekhaya naye umsizi ahole, ondle kubo. Manje uma yena esekhohlwa yingxenye yakhe, esegada wena ukuthi ungakuphi, kuyabheda mzala.
Ngake ngaba nomsizi owafika ezikhonzele imithi nje, aze acele abuze ukuthi ikhona yini inkinga uma egquma egunjini lakhe, ngamkhulula. Dukuduku, wasindiswa uthoko! Ubegoduka kanye ngenyanga. Uthe esuka wangitshela ukuthi akasezukusebenza ngesonto, uyaphumula ngenxa yomthetho ohambisana nokusindiswa.
Ngikhuluma ngomuntu esasihlala naye, elala, egeza edla kwami. Uma esethi akasebenzi ngesonto sekumele ngithini-ke? Uzoma kancane ukusebenza ebe eqhubeka nokubhubhudla ugesi namanzi la endlini? Hhay’bo, ngangingeke ngilunge. Ngabe ngiyezwa uma kuwumuntu ovele ohlala endlini yakhe yomqasho noma kubo ngoba uzobe ekhokha irenti, ekhokhela ugesi namanzi, azithengele ukudla aphinde agibele njalo ekuseni eza kwakho ezosebenza. Ngeke ngihlale nawe bese ungitshela ukuthi kawuthinti ngisho umshanelo nje ngesonto, kanti kini nenzenjani? Kanishaneli ngesonto ngoba nakhu nikholwa kakhulu?
Yizo zonke lezi zizathu ezenza abantu abaningi bathi sebeqasha ngokuhluza, bakhethe igenge esike yaphusha-phusha empilweni ngoba bayahlupha osisi abasebancane futhi isimo siyabavumela ngoba basuke besebancane. Kayikho into ecika njengomsizi ofika kwakho ajwayele omakhelwane adlule wena. Phathaphatha, sekuqhuma umgosi ngapha nangapha okanye usehlaselwa yizintombi zendawo zimnuka ngokweba amasoka azo.
Angithi omunye ufika abhayizele ebafaneni engakaboni kahle ukuthi zikhiphani. Uma sebembhonya sekumele wena umlamulele. Sake sathutha kwenye indawo singasafunwa muntu ngenxa yomzanyana wengane, he futhi bakithi. Wafika wabhubhisa, waqoma onogada bakule-complex engangihlala kuyo.
Ngizozwa mina ngoba sekuneziwombe zengxabano kuthiwa izinsizwa bezibhangqiwe, zathi uma zithola leyo mfihlo kasisi zasho ukubambana ngezandla kwase kuphoqa ukuba umphathi wonogada athi mangilindwe ngibuye emsebenzini ngizobikelwa ngalolu yacu lomzanyana osexabanise izisebenzi zakhe. Cabanga dude! Ngiyathanda ukubavuna abasizi bethu kepha kakumele sifihle nokubi abasigila ngakho. Kukhona oke afihle aqome abafowenu endlini bese uvele ungazi-ke manje ukuthi bunuku buni lobu. Omunye uthe kudala kusenalamanabukeni awashwayo benenkosikazi yakhe bathola ukuthi umzanyana uyenqena ukuwasha amanabukeni, ubhincisa ingane ucwazi usuku lonke. Babona ngoba ingane isitshabuka ukuthi kunenkinga. Kwesinye isigameko uthi bathiphiswa womakhelwane ukuthi kunombhemu abanele baphume nje endlini ekuseni ashushumbiswe azobhala u-4, adle ibhulekifasi endlini yabo bengekho. Akekho-ke onobufakazi bokuthi egunjini labo kwenzekani.
Iqiniso wukuthi sibaningi esifisa sengathi singaba nomlingo izingane zisheshe zikhule, zikwazi ukusala zodwa ukuze siphume kubazanyana ngoba uma sewuthe unebhadi uke uthole abahluphayo bonke, kuphinde kubekhona unyaka la othola khona abaphilayo bodwa kodwa iqiniso wukuthi njengakuyo yonke imisebenzi, abantu bayafika bahambe, akekho umzanyana ohlala kwakho ingunaphakade ngisho ungamphatha kahle noma kabi kanjani.
Empeleni kukhona othe abazanyana bayabekezela kulezi zinhlanga ezingenandaba ngempela nabo, bahlale iminyaka bese kuthi kithi esigijimisa ubuntu, bapense, badube ugcine nawe usumkhulula. Ngike ngizwe uthole umama kuthiwa usekhulise izingane zakwaSteenhuizen sezize zaphuma nasenyuvesi zasebenza. Hhayi ngoba bemtotosa, yingoba yena uyabahlonipha, uyabazisa. Ungathola ukuthi uma engaqashwa kwakho nje angasheshe ashiye, asazi!