Usolwa ngomuthi umbhishobhi

Liphinde lahlehliswa icala lakhe lokukhwabanisa

BAPHUME bedumele abantu abayizisulu zombhishobhi olahlwe ngamacala angama-745 okukhwabanisa emuva kokuhlehliswa kokukhishwa kwesigwebo ngolwesihlanu. Indlela abantu abebecasuke ngayo abanye bebelimisa ngembaba elokuthi u"nomuthi othi thi”.

Umbhishobhi Jabulani Mvubu webandla ihis Grace Ministries, emzinto, ngasogwini oluseningizimu yekwazulu-natal ubevele phambi kwemantshi unkz Christo Mazibuko.

Icala lihlehliselwe umhla ziyi-13 kunhlangulana (June) ngenxa yokuthi ummeli kammangalelwa ecele ukunikwa ithuba lokucubungula izicelo zezisulu mayelana nesigwebo okumele sinikwe umbhishobhi Mvubu.

Kuyithathe imizuzu engaphansi kweyishumi imantshi ukuba ilihlehlise icala.

Ngesikhathi kusalindwe ukungena kwemantshi enkantolo umbhishobhi Mvubu ubekhuluma encokola ebalisa ngokukhipha i-albhamu yakhe yomculo wokholo engazi nokuthi lidumephi.

Lithe lingahlehliswa icala waphumela emnyango ephelezelwa ngamalunga ebandla lakhe, kwezwakala izisulu zikhuluma zisho phambi kwakhe zithi: “Unomuthi othi lo muntu.

"Kunini lihlehla icala lakhe lingapheli, kuphekwe ikhanda lenja lona elingavuthwa.”

Lapho yena umbhishobhi Mvubu ubemoyizela ekhuluma nocingo ebiza abaqaphi bakhe ukuba bayomlanda.

ILANGA Langesonto lihabule umoya wokuthi izisulu zicela inkantolo ukuba imjezise umbhishobhi iphinde imphoqe ukuba azikhokhele izimali zazo nenzalo yazo. Yonke imininingwane isiyozwakala enkantolo ngosuku olunqunyiwe.

Ukuboshwa kukambhishobhi Mvubu kulandela uhlelo alusungula olubizwa ngezuza 4Life lapho wayegqugquzela khona abantu ikakhulukazi abazalwane ukuba bajoyine bengamaqoqo, umuntu emunye akhokha ur2 500 okuzothi uma kubuya izimali iqoqo ngalinye lizuze ur15 million.

Akubange kusenzeka lokho, bamthelekela abantu eshumayela emalangeni emzinto ngenyanga kazibandlela (December) ngonyaka wezi-2014 wasizwa ukufika kwamaphoyisa ambopha.

Uphume ngebheyili ka-r10 000 lathutha icala layoqulwa enkantolo yamacala obugebengu obuhleliwe njengoba eselinde isigwebo sakhe. knowledge.simelane@ilanganews.co.za

ISITHOMBE NGU: JOHN HLONGWA UMBHISHOBHI ujabulani Mvubu ngesikhathi ephuma enkantolo ngemuva kokuhlehliswa kokukhishwa kwesigwebo sakhe soxhaxha lwamacala okukhwabanisa abhekene nawo.