AWEPOLITIKI AGWINYA AMATHE NGENQUTHU
BALALA bengalele abamaqembu ezombusazwe Kwazulu Natal nakhu phela sekusondele usuku lomhla zingama-24 kunhlaba (May) lapho kuzobe kunokhetho lukamasipala wasenquthu maphakathi nekwazulu-natal owahlakazwa.
Amaqembu aconsa amathe lo masipala yi-african National Congress (ANC), Democratic Allience (DA), Inkatha Freedom Party (IFP), National Freedom Party (NFP), Economic Freedom Fighters (EFF), namanye.
Kusukela kwamenyezelwa lolu suku indawo yesenquthu isihanjelwe ngabaholi balawa maqembu beyonxenxa ivoti labantu bakulendawo. Bonke abathembisa intuthuko nokubalethela izidingo ngqangi.
Iphini likamengamneli wezwe umnu Cyril Ramaphosa selike lazifikela mathupha liyokhankasela iqembu lalo, lanxusa abantu ukuba bayethembe inhlangano yalo, lakhuza umkhuba wabazicebisa ngamathenda.
Inkosi umangosuthu Buthelezi WE-IFP nayo ifike enquthu yexwayisa abantu ngogalakajana abathenga amavoti nalabo abavotisa abantu abangesibo basenquthu. Ithembise ukuthi abayovotela iqembu layo bayobe bayihlabe esikhonkosini.
Umholi we-da Kwazulu Natal umnu Zakhele Mncwango uthi iqembu lakhe seligobe amadlangala enquthu: “Ngikhuluma nje mhla ziyi-17 kwephezulu sizobe sivakashelwe ngumholi wethu kuzwelonke umnu Mmusi Maimane ezokhuluma nabantu basenquthu. Nami ngihlala ngiya khona ngibakhuthaza ukuba basivotele ukuze sithuthukise ezolimo kuleya ndawo.”
Sekusemahlombe abantu baseNquthu ukuthi bazikhethela liphi iqembu okungaba yinkinga futhi uma iqembu eliwinayo lithole amavoti amancane okuphoqa ukuba linxuse amavoti amanye amaqembu.
Ukungasebenzi kwalo masipala kuthikameze ukulethwa kwezidingo zomphakathi kule ndawo.
Kuza lolukhetho nje kusaziliwe komunye umuzi emuva kokubulawa kwelunga leqembu LE-ANC kuleya ndawo.