BADONSA KANZIMA ABAHLELI BEGIGI LE-HIP HOP
BAPHOXEKILE abathandi bobumnandi kuvela ukuthi lihlehlisiwe igigi laminyaka yonke eselinenqwaba yabalandeli elaziwa ngeleyouth Hip Hop Festival (YHHF) eliba sethekwini, emoses Mabhida Stadium.
I-YHHF bekumele ibe sekuqaleni kwale nyanga unhlaba (May) ziyisi-6 endaweni efanayo. Umnikazi walo mcimbi, umnu Hlubi Radebe, utshele abathandi bobumnandi ukuthi baphoqelekile ukuwuhlehlisa ngenxa yezimo abebengakwazi ukuzilawula.
Uqinisekise ukuthi usazokwenzeka lo mcimbi kodwa akakakwazi ukubeka phansi usuku.
Lo mcimbi ugqame kakhulu eminyakeni emibili edlule kutheleka isihlabani saphesheya kwezilwa-ndle, e-united States of America (USA), uwilliam Leonard Roberts II, odume ngelikarick Ross.
Ngonyaka odlule kube nenkinga yezimali, eholele ekubeni kugcine ngokuba kuhoxiswe abaphesheya njengoba uradebe ethe bekudingeka cishe u-r4 million ukuqasha umculi waphesheya kwezilwandle, nokuyimali abebengenayo njengoba bekushoda abaxhasi.
Kowangonyaka owedlule umcimbi kugcine kubikwa ukuthi wumasipala wetheku ophonse esivivaneni u-r500 000 kuphela nokube wuxhaso olwenze umehluko ongatheni njengoba kuba nenqwaba yabaculi nabaletha izinsiza okudinga isamba esesabekayo ukubakhokhela.
Owangonyaka odlule ube sekuqaleni kukanhlangulana (11 June) okuyinyanga yentsha njengoba nabo bewumatanisa nentsha.
Selingakuqinisekisa ILANGA Langesonto ukuthi ukuhoxa kowanonyaka kungenxa yazo izimali njengoba uradebe werichie R Concepts ebehlale ekhala ngokuthi imali iphuma ngqo ephaketheni lakhe.
Ekhuluma nentandokazi yakho ukubeke kwacaca ukuthi oku- holele ekuhlehlisweni kwabo lo mcimbi yingoba basazama ukuthola abaxhasi.
“Wona umcimbi nakanjani uzobakhona, siwuhlehlise ngoba kukhona imali esisayicela kuhulumeni kanti sicelwe ukuba sime kancane ngoba kusabuyekezwa ezezimali.
"Sihlalele ethembeni lokuthi maduze basazise ukuthi simi kuphi nabo ngoba sisezinhlelweni zokuba bangene bagamanxe, bafake nezabo izinhlelo kulo mcimbi.
"Sifisa futhi bazibophezele okungenani iminyaka emithathu kuya phezulu ngoba kuyinkinga ukuhamba ufunana noxhaso minyaka yonke,” kusho uradebe, ogcizelela ukuthi phansi amaphaphu kubalandeli.
Ngonyaka odlule bekusina kudedelana izinkakha zakuleli oriky Rick, Major League DJS, WTF, Anatii, Dreamteam, OKMALUMKOOLKAT, Junior De Rocka, DJ Sliqe nabanye abaningi. zowakha@ilanganews.co.za