INTSHA ETHUBENI LOKUQEQESHWA NGEZEMFASHINI KWI-DFF
BADELE imvula ebilidliva ngoLwesihlanu namakhaza abeshubisa umnkantsha izolo ngomgqibelo ebotanic Gardens, ethekwini, abesilisa nabesifazane abebefisa ukuthola ithuba lokuba ngabakhangisi bezimpahla zokugqoka (models), kwinhlolokhono yedurban Fashion Fair.
Inhlolokhono iqale ngolwesihlanu yaphothulwa izolo ngomgqibelo lapho intsha ibiphume ngobuningi bayo ukuzozama inhlanhla. Umasipala wetheku uvulela intsha ithuba eliyingqayizivele lokuba yingxenye yombukiso omkhulukazi wezemfashini oba minyaka yonke, idurban Fashion Fair oba sethekwini.
Lo mcimbi ubuye unike ithuba lokuzibonakalisa kubasiki bengqephu abasafufusa nalabo asebephumelele ukuba bakhangise ngemisebenzi yabo kulo mbukiso. Unkk Zandile Gumede oyimeya yetheku, uthi sekuyinto esihambe yaqapheleka ukuthi umkhakha ofuze lona ungomunye wedala amathuba emisebenzi.
“Umasipala uqhamuke nohlelo ifashion Development Programme njengezinye zezindlela zokwenyusa umnotho. Lena yinkundla enhle yokuba intsha ifunde ngamathuba eza nendima yezemfashini.
"Lolu hlelo luyindlela esithuthukisa ngayo intsha futhi siyivula namehlo kulo mkhakha wezemfashini,” kusho yena.
Uthi uhlelo lokuthungatha abakhangisi luyindlela yokuvulela intsha amathuba ukuze ingene kulo mkhakha futhi ikwazi nokuba izivulele amabhizinisi ayo.
ILANGA Langesonto belikhona kule nhlolokhono ngolwesihlanu, intsha ibiphume ngobuningi bayo ikakhulukazi izolo ngomgqibelo. Ubuthi uma ufika ubhalise imininingwane yakho bese ubizelwa esigxobeni ( pole) esibhalwe isili- nganiso sobude obudingekayo.
Babodwa obubabona ukuthi vele bayamodela futhi bade ngokwenele. Silobe usindi Shangase oyiprogrammes Manager kwibusiness Support Tourism and Markets Unit kumasipala wetheku nosebe kwidff iminyaka, engakacacisi ngemuva komcimbi ukuthi bangaki abathole ingqayizivele yethuba nokuthi bazoqala nini ukuqeqeshwa.
Abafisa ukumodela bebengadingi ukuba nesipiliyoni noma babe ngaphansi kwe- agency, bekudingeka umazisi wabo ukuqinisekisa iminyaka yabo njengoba bebethatha intsha eneminyaka yobudala esuka ku-16-35.
Abazokhethwa bazothola uqeqesho olunzulu kwizazi zezemfashini. Bazophinde babe yingxenye yabazokhangisa ngezimpahla zabasiki bengqephu abehlukene kulo mbukiso ozoba ngoncwaba (August) khona ethekwini. tzondi@ilanganews.co.za