KUZOHLONISHWA IZINGQALABUTHO KUMA-SAMA NONYAKA
ASEGCINE emenyezelwe amagama abazohlomula ngezindondo zokuhlonishwa kwasebehlale iminyakanyaka embonini yomculo bengagobi uphondo.
Laba bazohlonishwa emcimbini wamasouth African Music Awards (SAMA) anonyaka azobe enziwa okwama-23.
Lezi zingqwele ezizothweswa umqhele welifetime Achievement Award, ziqhamuka emikhakheni ehlukene yomculo.
Urebecca Malope, udon Laka nobabsy Mlangeni yibona abazohlomula kanti bobathathu sebeneminyaka behleli kule mboni.
Urebecca obuye aziwe ngendlovukazi ye- gospel unenqwaba yezindondo azihlomule kuwona AMASAMA eminyakeni edlule kanti waziwa emazweni amaningi emhlabeni jikelele njengoba eze wanikezwa neziqu zobudokotela ngenxa yeqhaza lakhe kulo mculo.
Udon Laka usesematheni namanje kwabaningi ngokuba phambili ekulweleni amalungelo abaculi eze eduba amanye amaaward lapha eningizimu Afrika ngoba esola abahleli ngokungaweseki umculo wakhe.
Yinqwaba yabaculi ekhiqizwe ngubra Don njengoba abuye aziwe kanjalo. Ubephambili kusungulwa ikalawa Jazmee eminyakeni eminingi edlule ebambisene nodj Christos no-oskido, nokuyisitebele esikhulukazi namuhla kwezizimele eningizimu Afrika.
Ngeminyaka yama-70 nama-80 ubabsy ubengomunye wabaculi abebesophondweni kwababemele abantu abamnyama.
Nakuba ephila nokukhubazeka njengoba engaboni emehlweni, kodwa lokho kakuzange kumvimbe ekuzithuthukiseni emculweni.
Umnu Nhlanhla Sibisi oyisikhulu esiphezulu kumasama (CEO), uthi izihlabani ezifana nalezi ezintathu kakumele zishabalale emlandweni womculo, yingakho benqume ukuzihlonipha ngalolu hlobo.
Awanonyaka ama-award azoba ngonhlaba (May) zingama-27 esun City, enorth West. zowakha@ilanganews.co.za