UZIMISELE NGOKUYA KUDE EMPILWENI
UMLINGISI osafufusa ozakhele ugazi endimeni yezokungcebeleka esewumsakazi we-alfred Nzo Community Radio yasemount Ayliff, e-eastern Cape, uthi akazisoli nakancane ngezinqumo azithatha ngempilo yakhe ngoba ukholwa wukuthi konke okwenzekile bekudalwe ngunkulunkulu.
Umbongeni Tyabule (41), odume ngelikasdudla Semfene emsakazweni, ubekhuluma NELANGA Langesonto okokuqala ngokushenxa kwezokusakaza, agxile kwezikamabonakude.
Abanye bazomkhumbula emdlalweni kamabonakude osihloko sithi Ubambo, odlala kumzansi Magic, lapho edlala khona indawo kaluyanda.
Usdudla uthi impilo kuyena ifana NEDVD eqoshwayo, eya phambili engakwazi ukubuyela emuva yingakho-ke naye impilo yakhe iqhubeka iya phambili, igudla nezinselelo zayo.
Uthi ukusebenza umsebenzi omlethela udumo kumfundise lukhulu ngokuthi uhlangana nabantu abacabanga ngokwehlukile nabanezimilo ezingafani, nokuthi konke osukwenzile okuhle kuyashabalala kuphele nya ngephutha elilodwa olenzile.
“Ngikhule ngivele ngifisa ukuba semkhakheni wezokungcebeleka futhi ngikholelwa ekutheni lokho kuzokwenzeka ngihlala khona lapha emount Ayliff - ngeke ngiye egoli ngoba ngifuna ukufezekisa iphupho lami, ngizolifezekisa la kwesami kuqala,” kusho usdudla Semfene.
Uthi uphume kwezokusakaza engakathandi njengoba wakhushulelwa esikhundleni khona emsakazweni i-alfred Nzo nokho okwenza ukuthi angathathi isikhathi eside enza lowo msebenzi njengoba engasiyena umuntu wehhovisi.
“Empilweni yami yokuphanta ngihlangene nabaphathi bengomso Films nozuko Nodada, Mawande Magadla nodumisani Mbebe owazakhela igama emdlalweni kamabonakude owuchungechunge odlala KU-SABC 1, igenerations,” kusho yena.
Uthi uqhubekile nokudlala izindawo eziningi njengoba abanye bezomkhumbula emdlalweni obudlala ku-etv othi Matatiele, lapho ebedlala khona indawo kasomabhizinisi oyiqola ebizwa ngomaximum.
Uthi kumanje uqopha Ukhakhayi, nalo oludlala ku-etv.
Usdudla uthi nakuba esehambe ibanga kwezokulingisa kodwa usafisa ukuba ngudj kwesinye sezikhondlakhondla zemisakazo yakuleli.
Uyakholelwa kuyena futhi uthi akafisi ukufana nomunye umuntu kwezokulingisa kepha ufisa abantu bafunde kuye ngendlela adonse kanzima ngayo empilweni kodwa bangafisi ukuba nguyena.