Usebenza nasehhotela njengompheki oqeqeshiwe
UNESIFISO sokuphatha wonke amabhande omhlaba usiboniso “Tiger” Gonya ocelwe ngunina, umirriam Gonya ukuba angene esibhakeleni ukuze akwazi ukuzivikela kubafana abebemshaya ekwaluseni.
Ugonya uzalwe mhla zingama-27 kunhlangulana (June) edukuduku, emtubatuba enyakathompumalanga yekwazulu-natal. Uzalwa ngumirriam nomzonzana Mthethwa.
Bobabili basawadla amabele. Bane kubo, ngamantombazane amabili nabafana ababili kuqala urose, kuze ulindeni, kube ngusibusiso bese kugcina yena. Uqale isibhakela ngowezi-2003 enza ugrade 6 ebuhlebemvelo Primary School.
Uphothule ugrade 12 esilethukukhanya High School. Uneziqu zehospitality Management azenze e-international Hotel School iminyaka emithathu. Ungomunye wabapheki abaphambili elangeni
Hotel, ethekwini.
Ukleliswe waba ngowesine emhlabeni kwiworld Boxing Organisation (WBO) kwi- bantamweight ephethwe nguzolani Tete. Ubekwe kweyesine emuva kwempumelelo yakhe empini ebimhla lulunye kumbasa (April) nonyaka. Kule mpi uhlule ngamaphuzu u-immanuel Naidjala wasenamibia. Uphethe nebhande LEWBA e-afrika. Ukleliswe yiWBA endaweni yesi-6. Uqale lo mdlalo eqeqeshwa nguscelo Sithole emtubatuba kanti manje uphekwa ngusizwe Mthembu kuthi imenenja yakhe kube nguzwilenkosi Magudulela. Ungaphansi kweludonga Boxing Promotions kathulani “Nkunzi” Magudulela. Ingxoxo yela
NGA Langesonto
nogonya ngempilo yakhe yangaphandle kwenkundla ihambe kanje:
ILANGA
Langesonto:
Uyenzile imikhuba eyenziwa ngabafana basemakhaya?
Gonya:
Ngiyenze yonke. Ngelusile, ngaqhathwa. Empeleni ngilwe kakhulu kwazise ekhaya bekunezinkomo mhlawumbe yikhona okungenze ngagcina sengiwumshayisibhakela. Nakhona ngaphoqwa ngumama ukufunda ukulwa emuva kokuba bengihlulwa ngabanye abafana ekwaluseni. Bengingedwa engekho ozongisiza kwazise umfowethu omdala ubesebenza empumalanga. Ngiphoqelekile ukuba ngijoyine ezamankomane ukuze ngizivikele.
ILANGA Langesonto: Uyakholelwa emuthini?
Gonya: Cha, ngiwumzalwane. Ngikholelwa enkolweni yamajuda.
ILANGA Langesonto: Ungumuntu onjani?
Gonya: Ngiwumuntu ozinikelayo entweni ayenzayo. Ngiyathanda ukubona abantu bejabule.
ILANGA Langesonto: Uhamba nganhloboni yemoto?
Gonya: Nginetoyota Hilux esebenza ekhaya ukulanda izisebenzi zasesimangaliso Wetland kodwa engizifela ngayo yigolf GTI.
ILANGA Langesonto: Usugcagcelwe?
Gonya: Kangikashadelwa kodwa ukhona umuntu engithandana naye. Kasikabi nazo izingane.
ILANGA Langesonto: Usichitha kanjani isikhathi sakho?
Gonya: Kanginaso isikhathi sokuphumula kwazise ngiwuchef elangeni Hotel, ethekwini. Ngisebenza izinsuku eziyisihlanu esontweni. Ngingena u-14h00 ngiphume u-23h00.
ILANGA Langesonto: Njengomuntu owuchef yikuphi ukudla okukugculisayo uma ukwenza.
Gonya: Ngiwungcweti we-italian Food ne- pasta.
ILANGA Langesonto: Wena uthanda nhloboni yokudla?
Gonya: Ngizifela ngophuthu nenyama yenkomo.
ILANGA Langesonto: Yisiphi isilwane osesabayo nosithandayo?
Gonya: Ngithanda ikati. Ngingabaleka ngizephule uma ngibona inyoka.
ILANGA Langesonto: Emidlalweni ewuchungechunge yakuleli ukhona yini owulandelayo?
Gonya: Isikhathi setv kanginaso. Ngivuka ekuseni ngiye ejimini uma ngibuya ngiyaphumula kancane bese ngilungiselela ukuya emsebenzini. Uma kwenzekile ngabuka umabonakude ngiyaye ngibuke izindaba nesibhakela.
ILANGA Langesonto: Ukhona omunye umdlalo owuthandayo?
Gonya: Ngithanda ibhola lombhoxo. Esinye isifiso sami wukugijima icomrades Marathon.
ILANGA Langesonto: Ikhona ikilabhu kanobhutshuzwayo oyilandelayo kuleli naphesheya?
Gonya: Ngilandela i-orlando Pirates kuleli kanti umdlali engimuthandayo ngu-andile Jali (obegijima kuyona ngaphambi kokuya ebelgium), phesheya ngithanda ibarcelona yasespain, ngikhonze ulionel Messi.
ILANGA Langesonto: Ulalela nhloboni yomculo?
Gonya: Ngithanda umaskandi. Ngilandela imfez’ emnyama.
ILANGA Langesonto: Ukhona ezinkundleni zokuxhumana?
Gonya: Ngikhona kwifacebook ngiwusiboniso Gonya. Ngiyatholakala nakwiwhatsapp kwabanenombolo yami. Ngiphatha i- phone yakwamicrosoft.
ILANGA Langesonto: Yiliphi izwe ofisa ukulivakashela?
Gonya: Ngithanda i-england. ILANGA Langesonto: Zikhona izinto osuzizuzile kwezamankomane?
Gonya: Nginomuzi eballito. Kumanje ngakhela umama umuzi emtubatuba kwazise uyikho konke kimina. Ngifuna aziqhenye ngami.
ILANGA Langesonto: Uthini umyalezo wakho entsheni?
Gonya: Mayihlukane nezidakamizwa. Intsha eningi ingene shi kulo mbulalazwe. Kufanele igxile esikoleni nakwezemidlalo.
ILANGA Langesonto: Uma ungaba ngumengameli wezwe yini ongayenza?
Gonya: Ngingaqeda umthetho wokukhishwa kwezisu ngoba uphambene nonkulunkulu. Ngiqinisekise ukuthi ngifeza izidingo zabantu njengokwakha amathuba emisebenzi.
ILANGA Langesonto: Yini ozimisele ngokuyenza uma ungasekho kwezamankomane?
Gonya: Ngizimisele ngokushadelwa eminyakeni eyisihlanu ezayo bese ngivula inkampani yami yokupheka. Ngibe nepulazi ngifuye izinkomo.