LIZOZUZA ELAKULELI NGESIVUMELWANO NE-LA LIGA
IZOZUZA lukhulu iningizimu Afrika ngesivumelwano sokusebenzisana esisayinwe yisouth African Football Association (SAFA) nela Liga okuyiligi enkulu yasespain.
Lesi sivumelwano sisayinwe ngudanny Jordaan ongumengameli wesafa nojavier Tebas owengamele ila Liga ngolwesihlanu emahhovisi ela Liga asegoli.
Lesi sivumelwano sithinta izinhlelo zokuthuthukiswa kwebhola, amasiko nokuqinisa amaxhama okuxhumana. Nokho sigxile kakhulu ekuthuthukiseni ibhola emazingeni aphansi. ILA Liga izosiza isafa ukuthuthukisa ibhola kuzona zonke izingxenye zakuleli, ikakhulukazi ezindaweni zasemakhaya. Izoyekelela nasekuthuthukisweni kwebhola ezikoleni.
ILA Liga isimeme ithimba lesafa ukuvakashela espain ukuze libone ukuthi zisingathwa kanjani izinhlelo zokungenisa inzuzo nezokumaketha njengoba iligi yakhona idume umhlaba wonke. Kuhlelwa nokuthi kube namakilabhu amabili asespain azokuba nemidlalo yobungani nawakuleli.
ºkuzohanjiswa inqwaba yabadlali abasebancane ukuyoqeqeshwa espain. Ulionel Messi waseArgentina ogijima kwibarcelona yasespain, ufakwe ezinhlelweni zokuthuthukiswa kwebhola esemncane kakhulu ngokweminyaka yobudala espain njengoba esengundabamlonyeni umhlaba wonke.
Ujordaan uthi lobu budlelwano buhambisana kahle nohlelo lwesafa lwe- vision 2022. ILA Liga inobudlelwano namazwe amaningi ewasiza ukuthuthukisa ibhola okubalwa ikenya, ijapan, inigeria, icolombia, ihonduras, i-ecuador namanye.
“Sizozuza lukhulu ngokusayina lesi sivumelwano. Abafana abancane bayayithanda iligi yasespain futhi bazolithokozela ithuba lokuyoqeqeshwa khona,” kusho ujordaan.