Isilonda kukaizer Motaung ngechiefs
Ukhala ngokuhlambalazeka benganqobi lutho
UKAIZER “Shintsha Guluva” Motaung ( osesithombeni) ongusihlalo wekaizer Chiefs uveza imizwa yakhe nobuhlungu anabo ngesimo sale kilabhu eqophe umlando omubi iqeda isizini yesibili ingayazi inkomishi.
Ichiefs ijabhise abalandeli, abaxhasi nabaphathi njengoba iphinde yehluleka ukunqoba inkomishi nakule sizini. Izibeke emlandweni omubi wokunganqobi nkomishi kumasizini amabili elandelana okuyinto ebingakaze yenzeke kule kilabhu selokhu kusungulwe ipremier Soccer League (PSL) ngowe-1996.
Konke lokhu kwenzeka ngaphansi kobuholi bukasteve “Mphathi” Komphela ongumqeqeshi, onerekhodi elibi njengoba emlandweni wakhe wokuqeqesha engakaze ayinqobe inkomishi.
Umotaung uveza imizwa yakhe ngesimo esenzeka ekilabhini yakhe.
“Isizini esibe nayo kayibanga yinhle neze. Empeleni nje isihlambalazile ekubeni siyikilabhu enkulu futhi enomlando omuhle. Ngifuna ukukubeka kucace ukuthi ngiphatheke kabi ukuthi kazizange zenzeke zonke izinto ebesizifisa kuqala isizini.
“Kodwa-ke okuningi sizokuhlalela uma sekusongwe isizini. Sizobheka kahle yonke into sithole nemibiko yomqeqeshi bese sibona ukuthi kugcina kwenzakaleni,” kusho umotaung emcimbini wokwethula abaxhasi abasha bale kilabhu, imedshield. Kuthiwa abakwamedshield bazofaka imali elinganiselwa ku-r5 no-r6 million ngesizini.
Nakuba umotaung ethi basalinde nombiko kakomphela kodwa abasondelene kakhulu nomndeni wakwamotaung bathi sekuqalile ukuthungathwa komqeqeshi omusha.
Kuthiwa ubhekwa e-europe. Umotaung ubuye wakhala ngodonga lwasemuva wathi lubenzele phansi ngale sizini.
“Emidlalweni eminingi esihlulwe kuyona senzelwe phansi yizitobha zethu. Kuzophoqa ukuthi singene emakethe sibheke izitobha ngoba kakuhambi kahle. Kuyabonakala ukuthi abanye abadlali bethu imilenze isiyabasinda ngenxa yokuthwala imidlalo eminingi. Kodwa-ke konke lokho kuzokwenzeka sekuphele isizini sesihlalile sabonisana ngakho konke,” kusho umotaung.